Rafael Ýrazbahtın «Qaırat» komandasynyń Londondaǵy oıynyn baǵalady
ASTANA. KAZINFORM — «Qaırat» fýtbol klýbynyń bas bapkeri komandanyń «Arsenaldan» (London) syrt alańda 2:3 esebimen jeńilgenine qatysty pikir bildirdi, dep habarlaıdy agenttiktiń menshikti tilshisi.
Matchtan keıingi baspasóz máslıhatynda almatylyq quramanyń jattyqtyrýshysy Rafael Ýrazbahtın jınaqtalǵan tájirıbeniń mańyzdylyǵyn jáne komandanyń eýropalyq dodada júrip ótken jolyn atap ótti.
— Bizdiń fýtbol ertegimiz aıaqtaldy. Jınaǵan baǵa jetpes tájirıbege óte qýanyshtymyz. Biz úzdik komandalarmen oınap, top-klýbtardy Qazaqstanǵa ákeldik, — dedi Ýrazbahtın.
Onyń aıtýynsha, almatylyq klýbtyń oıyny jankúıerlerdiń fýtbolǵa degen qyzyǵýshylyǵyn aıtarlyqtaı arttyrdy, komandanyń Chempıondar lıgasyna qatysýy belgili bir dárejede qazaqstandyq fýtboldyń qarqyndy damýyna serpin berdi.
Bas bapker «Arsenalǵa» qarsy match týraly aıta kelip, qarsylastyń joǵary deńgeıi men oıynshylarynyń jankeshtiligin erekshe atap ótti.
— Biz úzdik komandanyń birimen oınadyq, bul biz úshin baǵa jetpes tájirıbe boldy. Jigitter jaqsy óner kórsetti, olarǵa baryn salǵany úshin alǵys aıtamyz. Alǵashqy mınýttarda biraz abdyrap qaldyq. Múmkin tolqyǵan shyǵar. Qarsylastyń oıynyn qaptalǵa baǵyttap, ortalyqty jaýyp, tikeleı pastarǵa jol bermeýge kelistik. Alaıda úshinshi mınýtta qatelik jasap, gol jiberip aldyq, — dedi almatylyq komandanyń bas bapkeri.
Qarymta shabýylda belgilengen penaltı «Qaırattyń» oıynǵa qaıta oralýyna múmkindik bergenin aıtyp, bul gol bolmasa komanda psıhologııalyq turǵydan áldeqaıda qıyndyqqa tap bolatynyn atap ótti.
Bapker sondaı-aq jankúıerlerge qoldaý kórsetkeni úshin alǵysyn bildirip, 60 myń oryndyq «Emıreıts» stadıonynda komanda óz jankúıerlerin anyq estigenin aıtty.
Sóz sońynda Ýrazbahtın komandanyń Londondaǵy kúrdeli synaqtan abyroımen ótkenin jetkizdi.
— Biz úshin bul synaqtan — top-klýbqa qarsy matchtan ótý mańyzdy boldy. Men «jigitter alańda baryn salady» dep aıttym, biz dál solaı istedik dep oılaımyn. Biz bul matchty abyroımen ótkizdik, — dep túıindedi almatylyq komandanyń bas bapkeri.
Buǵan deıin «Qaırat» komandasy «Arsenalǵa» 2:3 esebimen ese jibergeni týraly jazdyq.