Rafael Ýrazbahtın: «Arsenalmen» kezdesýde sapaly oıyn kórsetý mańyzdy
ASTANA. KAZINFORM — «Qaırat» komandasynyń bas bapkeri Rafael Ýrazbahtın UEFA Chempıondar lıgasy negizgi kezeńiniń segizinshi týryndaǵy Anglııanyń «Arsenalmen» (London) kezdesýinen qandaı nátıje kútetinin aıtyp berdi.
Bul kezdesý 28 qańtardan 29-na qaraǵan túni saǵat 1:00–de Anglııa astanasy London qalasyndaǵy «Emıreıts» stadıonynda bastalyp, «Qazaqstan» telearnasynan tikeleı efırde kórsetiledi.
Komandalar 2025/26 jylǵy maýsymdaǵy Chempıondar lıgasy negizgi kezeńindegi týrnır kestesinde birinshi jáne sońǵy oryndarda keledi.
Rafael Ýrazbahtın týrnır kestesine qaramaǵanyn jáne «Qaırattyń» sońǵy, «Arsenaldyń» birinshi orynda turǵanyna mán bermeıtinin aıtty.
— Biz Chempıondar lıgasynda jetkilikti oıyn ótkize aldyq jáne jigitter ózine úlken tájirıbe jınaqtady. Alǵa qoıǵan maqsatymyz jáne tapsyrmamyz bar. Jańa maýsymǵa daıyndalamyz. Qol jetken jetistikti qaıtalaýymyz kerek. Barlyq oıymyz — jaqsy daıyndalyp, tańdaǵan jolymyzdy tabandylyqpen jalǵastyrý. Sondaı-aq «Arsenalmen» matchqa jigitterdi erekshe baptaýdyń qajeti joq. Álemdik deńgeıdegi klýbtarmen mundaı oıyndar árkimniń ómirinde jıi bola bermeıdi. Jigitterge qosymsha motıvatsııa berýdiń qajeti joq. Kerisinshe óziniń qalypty deńgeıin saqtap, sapaly oıyn kórsetý mańyzdy, — dedi Rafael Ýrazbahtın.
«Qaırattyń» bas bapkeri Chempıondar Lıgasynda «Lıverpýlmen» kóbirek oınaǵysy keletinin atap ótti. Óıtkeni bul komandada buryn nemis ıÝrgen Klopp qyzmet atqardy. Al «Qaıratta» buryn onyń oıyn júıesine uqsas tájirıbesi bar nemis mamandary eńbek etti. Degenmen, ol álemdik deńgeıdegi úzdik bapker Mıkel Artetanyń jetekshiligimen oınaıtyn «Arsenaldyń» oıyn mánerine qurmet kórsetetinin aıtty.
— «Arsenal» Anglııa Premer-lıgasy ótken týrynda «Manchester ıÝnaıtedke» ese jiberdi. Bul komandanyń bizben kezdesýge degen kózqarasyna áser etpeıdi degen oıdamyn. Olardyń aldynda óz maqsaty men tapsyrmasy bar. Qandaı qarsylas ekenine qaramastan árbir kezdesýde jeńis úshin jasyl alańǵa shyǵady. Olar jeńis týraly oımen bizben kezdesýge shyǵady jáne olardan qosymsha motıvatsııa kútpeımiz. Londondyq klýbty bizden keıin APL-da mańyzdy oıyndar kútip tur. Onda rotatsııa bolady dep kútemin. Komandada 2 quram bar jáne ár pozıtsııada 2-3 sapaly fýtbolshy jınalǵan, — dedi Rafael Ýrazbahtın.
Almatylyq «Qaırat» klýbymen kelisimshartyn taǵy eki jylǵa uzartqan qaqpashy Temirlan Anarbekov «Arsenalmen» kezdesýdi asyǵa kútetinin aıtady.
— Men bala kezimnen Anglııa Premer-lıgasy stadıonynda oınaýdy armandap keldim. Mine, biz búgin «Emıreıts» stadıonynda otyrmyz. Men munda oıyn ótkizetinimizdi aldyn ala bilgende erekshe qýandym. Qazirge deıin Chempıondar lıgasynda kóptegen oıyn ótkizip úlgerdik. Bizdiń ózimizge senimdiligimiz arta tústi. Aldaǵy kezdesýge tolyqtaı daıyn bolamyz. Qarsylasymyz tájirıbeli komanda ekenin túsinemiz. Biz oǵan daıynbyz, — dedi Temirlan Anarbekov.
Qaqpashy «Brıýggemen» kezdesýde tórt gol jiberip alǵanyna baılanysty tıisti qorytyndy jasalǵanyn atap ótti.
— Ár nárse bolady, onyń ishinde qatelikter de kezdesedi, degenmen bul — oıyn. «Brıýggeden» keıin tıisti qorytyndy jasaldy. Sondyqtan qorǵaýshylarmen jumys barysynda jaýapkershilikti arttyryp, olarǵa kemshin tustardy aıtýǵa kóńil bólemin, — dedi Temirlan Anarbekov.
«Qaırat» qaqpashysy top-klýbtardan usynys túsip jatqan jaǵdaıda komanda basshylyǵy ózine habarlaıtynyn aıtty. Ázirge ondaı jaǵdaı bola qoıǵan joq. Sondyqtan ol úshin «Qaırat» sapynda sátti oıyn kórsetý mańyzdy. Ol komandamen uzartylǵan kelisimshartqa sáıkes qyzmet atqarady.
Eske salsaq, budan buryn «Qaıratpen» kezdesýde «Arsenal» sapynda kimder qatysa almaıtyny belgili boldy.