Rafael Nadaldyń raketkasy rekordtyq somaǵa satyldy

ASTANA. KAZINFORM — Ispanııalyq tennısshi Rafael Nadaldyń 2017 jylǵy Rolan Garros týrnıriniń fınalynda ustaǵan Babolat raketkasy aýktsıonda 157,3 myń AQSh dollaryna satyldy.   

Shampionat.com saıtynan málim etkenindeı, bul tennıs raketkasyn satýdaǵy rekordtyq soma bolyp esepteledi.

Nadal sol básekede shveıtsarııalyq Sten Vavrınkany 6:2, 6:3, 6:1 esebimen utqan edi.

ESPN málimetine qaraǵanda, burynǵy rekordtyq nátıje de ıspanııalyq tennısshige tıesili. 2023 jyly onyń taǵy bir raketkasy 139,7 myń dollarǵa ótken edi.

Onymen Nadal 2022 jyly Aýstralııa ashyq chempıonatynda oınaǵan edi. Fınalda ol kambek jasap, reseılik Danııl Medvedevti 2:6, 6:7 (5:7), 6:4, 6:4, 7:5 esebimen qapy qaldyrǵan edi.

«Úlken dýlyǵa» týrnırleriniń 22 dúrkin chempıony Rafael Nadal sporttyq mansabyn 2024 jyly Devıs kýbogy kezinde aıaqtaǵan bolatyn.

Eske sala keteıik, budan buryn Aleksandr Býblıktiń dúnıejúzilik reıtıngide TOP-40-qa jaqyndaǵanyn jazǵan bolatynbyz.