Rafael Nadal tórtinshi márte US Open jeńimpazy atandy
NUR-SULTAN. QazAqparat – Tennısten AQSh-tyń ashyq chempıonatynyń fınalynda ıspanııalyq Rafael Nadal reseılik Danııl Medvedevti tize búktirdi, dep habarlaıdy QazAqparat.
Jarys Nıý-Iorktegi Ulttyq tennıs ortalyǵynyń «hard» jabyndysy tóselgen korttarynda ótti.
Týrnırdiń besinshi raketkasy, 23 jastaǵy reseılik sportshy Nadalden 5:7, 3:6, 7:5, 6:4, 4:6 esebimen jeńilip qaldy. Bul sportshylardyń ekinshi ret kezdesýi. 11 tamyz kúni Medvedev Nadal Monrealdegi týrnırdiń fınalynda qarsylasyp, 3:6, 0:6 esebimen jeńilip qalǵan edi.
Kásibı tennısshiler qaýymdastyǵynyń (ATR) reıtınginde ekinshi orynda turǵan 33 jastaǵy Nadal US Open chempıonatynda osymen tórtinshi ret jeńiske jetti. Sondaı-aq, ol Roland Garros chempıonatynda on eki márte, «Ýımbldonda» eki ret jáne Australian Open-de bir márte jeńiske jetken. Osylaısha Nadal Úlken dýlyǵa týrnırleriniń 19 márte jeńimpazy atanǵan. Ispanııalyq tennısshi dál osy kórsetkishpen ekinshi orynǵa ornalasty. Birinshi orynda jıyrma márte úzdik atanǵan shveıtsarııalyq Rodjer Federer tur.
AQSh-tyń ashyq chempıonaty - Úlken dýlyǵa týrnırleri maýsymynda tórtinshi ári qorytyndy jarys. Bıyl júlde qory $57 mln qurady. Nadal jeńisi úshin $3,85 mln, Medvedev $1,9 mln aldy. Senbi kúni áıelder arasyndaǵy synnyń fınalynda 19 jastaǵy kanadalyq Bıanka Andreeský amerıkalyq Serena Ýılıamstan aılasyn asyrǵan bolatyn. 2018 jyly erler arasyndaǵy jekeleı týrnırde serbııalyq Novak Djokovıch jeńimpaz atanǵan edi.
