Rafael Grossı Qazaqstanmen yntymaqtastyqty qamtıtyn jol kartasyn ázirleýdi usyndy
ASTANA. KAZINFORM — Venaǵa sapar aıasynda QR Syrtqy ister mınıstri Ermek Kósherbaev Atom energııasy jónindegi halyqaralyq agenttiktiń (AEHA) Bas dırektory Rafael Grossımen kezdesti. Ol AES salý jobasyn iske asyrýdyń barlyq kezeńderinde Qazaqstanǵa jan-jaqty qoldaý kórsetýge daıyn ekenin bildirip, yntymaqtastyqtyń basqa da negizgi baǵyttaryn qamtıtyn ózara is-qımyl jónindegi jol kartasyn ázirleýdi jáne qol qoıýdy usyndy.
Qazaqstan syrtqy saıası vedomstvosynyń basshysy elimizdiń ulttyq atom salasyn damytý jáne atom elektr stantsııalaryn salý jónindegi josparlarymen tanystyryp, kómirtektik beıtaraptyqqa qol jetkizý jónindegi strategııalyq mindettiń ózektiligin atap ótti. E.Kósherbaev AEHA-men seriktestik, sonyń ishinde sharttyq-quqyqtyq bazany keńeıtý Qazaqstan syrtqy saıasatynyń basym baǵyttarynyń biri ekenin aıtyp, Agenttiktiń jahandyq qaýipsizdik arhıtektýrasyn qoldaýdaǵy jáne halyqaralyq taratpaý rejımin nyǵaıtýdaǵy mańyzdy róline nazar aýdardy.
Mınıstr Qazaqstanmen ózara is-qımyldyń barlyq baǵyttary boıynsha kórsetilip kele jatqan turaqty qoldaýy úshin AEHA basshysyna alǵys bildirip, kadrlyq áleýetti damytý jáne Agenttik qurylymdarynda qazaqstandyq mamandardyń ókildigin qamtamasyz etý jónindegi jumysty jalǵastyrýdyń mańyzdylyǵyna toqtaldy. Qazaq dıplomaty AEHA sheńberinde múshe memleketterdiń egemendik teńdigin qalpyna keltirý máseleleri boıynsha kún tártibin ilgeriletýdegi Qazaqstannyń eleýli úlesin de atap ótti.
R. Grossı atom energııasyn beıbit maqsatta paıdalaný salasyndaǵy Qazaqstannyń mańyzdy úlesin jáne AES salý josparlary men ıadrolyq medıtsınany damytýdan Óskemen qalasyndaǵy AEHA tómen baıytylǵan ýran bankiniń tabysty qyzmetine deıingi bastamalaryn aıryqsha atap ótti. Ol AES salý jobasyn iske asyrýdyń barlyq kezeńderinde Qazaqstanǵa jan-jaqty qoldaý kórsetýge daıyn ekenin bildirip, yntymaqtastyqtyń basqa da negizgi baǵyttaryn qamtıtyn ózara is-qımyl jónindegi jol kartasyn ázirleýdi jáne qol qoıýdy usyndy.
Qazaqstanda AEHA tehnıkalyq yntymaqtastyq baǵdarlamasy aıasynda júzege asyrylyp jatqan onkologııalyq aýrýlardy emdeýge arnalǵan ınnovatsııalyq ıadrolyq tehnologııalardy damytý, aýyl sharýashylyǵynyń tıimdiligin arttyrý, sondaı-aq burynǵy Semeı polıgony aýmaǵyn qalpyna keltirý boıynsha jobalar joǵary baǵalandy.
Kezdesý qorytyndysy boıynsha Qazaqstan men AEHA kópjaqty yntymaqtastyqty odan ári keńeıtýge jáne tereńdetýge ózara múddelilik pen daıyndyqty rastady.
Aıta keteıik, Syrtqy ister mınıstrliginde Lıvannyń jańa Elshisi senim gramotalarynyń kóshirmelerin tabystady.