Rafael Grossı BUU Bas hatshysy qyzmetine kandıdat bolýǵa nıetti

ASTANA. KAZINFORM — Atom energııasy jónindegi halyqaralyq agenttiktiń (MAGATE) basshysy Rafael Grossı BUU Bas hatshysy laýazymyna úmitker bolǵysy keletinin málimdedi, dep jazdy AZƏRTAC agenttigi. 

Qazirgi Bas hatshy Antonıý Gýterrıshtiń ókilettik merzimi 2026 jyldyń 31 jeltoqsanynda aıaqtalady. Sol jyly BUU Qaýipsizdik Keńesi Bas hatshy qyzmetine kandıdat usynýy tıis. Jańa Bas hatshy 2027 jyldyń 1 qańtarynan bastap óz mindetine kirisedi.

— Qazirgi tańda BUU qıyn jaǵdaıda tur. Men BUU-dy qaıtadan mańyzdy ete alamyz dep senemin. Eger siz qaqtyǵystar men zorlyq-zombylyqtyń ósýi alańdatady dep aıtsańyz, biraq sonymen qatar basqa nárselerge nazar aýdara berseńiz, bul – ekijúzdilik, – dedi Grossı BUU Bas Assambleıasy aıasynda Nıý-Iorkte ótken kezdesýde.

Onyń aıtýynsha, búginde BUU álemde beıbitshilikti saqtaý mindetin oryndaı almaı otyrǵanyn «bári moıyndaıdy». Osyǵan baılanysty argentınalyq saıasatker MAGATE basshysy retinde jınaǵan tájirıbesi bul qyzmetke saılanýyna kómektesetinine senim bildirdi.

Grossı sonymen qatar, barlyq tarappen dıalog júrgizýge jáne barlyqqa qolaıly araaǵaıyn bolýǵa umtylatynyn aıtty.

Aıta keteıik, Bas Assambleıada BUU-nyń 80 jyldyǵyna arnalǵan saltanatty jıyn ótti.