Radıojýrnalıstiń basty qarýy – daýysy men kóńil kúıi

ASTANA. KAZINFORM – Búgin – Dúnıejúzilik radıo kúni. Tehnologııalar qaryshtap damyǵan zamanda da radıo óziniń jedeldigi men erekshe tartymdylyǵyn joǵaltqan joq. Osy aıtýly merekede «Jibek Joly» radıosynyń júrgizýshisi Gúlnaz Amanǵalı kásibı joly, radıonyń telearnadan aıyrmashylyǵy jáne efır syrtyndaǵy qyzyqtaryn bólisti.

Radıonyń telearnadan basty aıyrmashylyǵy – onyń jedeldiginde. Eger teledıdarda montaj ben arnaıy daıyndyqqa ýaqyt ketse, radıoda aqparatty sol sátte-aq halyqqa jetkizýge bolady. Gúlnazdyń aıtýynsha, radıojýrnalıstiń basty qarýy – onyń daýysy men kóńil kúıi.

– Jýrnalıstiń kóńil kúıi mindetti túrde tyńdarmanǵa jetedi. Efırge jaqsy emotsııamen shyǵý – bizdiń basty mindetimiz. 2014 jyly oqýymdy aıaqtaǵanda, taǵdyr meni Astana radıosyna (qazirgi Jibek Joly) jastar praktıkasymen alyp keldi. Sodan beri bul qara shańyraq meniń ekinshi úıime aınaldy. Tipti, jan jarymdy da osy jerden kezdestirip, búginde eki balanyń anasymyn. Sondyqtan radıo – meniń ómirimniń ajyramas bóligi, – deıdi Gúlnaz Amanǵalı Jibek Joly telearnasynyń Bugin LIVE baǵdarlamasynda.

Jibek Joly radıosy Prezıdent teleradıokesheniniń quramynda bolǵandyqtan, memlekettik mańyzy bar aqparattardy der kezinde jyldam ári baıypty únmen taratýdy talap etedi.

– Keıde mańyzdy aqparattar kesh túsip jatady. Sony tez montajdap, efırge júgirip keletin kezder bolady. Mundaıda eń bastysy – aptyqpaý. Júrekti basyp, «men daıynmyn» dep efırdi bastaý kerek, óıtkeni tyńdarman seniń qobaljyǵanyńdy daýys yrǵaǵyńnan birden sezedi. Daýys – bizdiń qarýymyz. Sondyqtan sýyq ishpeı, daýysty árdaıym baptaý, kúndelikti jattyǵý jasaý – bizdiń kásibı ádetimiz, – deıdi júrgizýshi.

Jibek Joly radıosy ótken jyldyń 1 mamyrynda ashylǵanyna qaramastan, qazirdiń ózinde tyńdarmannyń ystyq yqylasyna bólenip úlgerdi. Tańǵy 7-den túngi 1-ge deıin aqparat taratatyn tolqynda saıası tok-shoýlardan bastap, kóńildi oıyn-saýyq baǵdarlamalaryna deıin bar.

– Bizde ár saǵat saıyn jańalyqtar taraıdy. «Wake Up» tańǵy shoýymen jurtty oıatsaq, «Siz ben biz» baǵdarlamasynda tyńdarmanmen tyǵyz keri baılanys ornatamyz. Al keshkisin «Ózimiz otyryp sháı isheıik» baǵdarlamasymen halyqty keshki erekshe kóńil kúıge bóleımiz. Bolashaq radıojýrnalısterge aıtarym: izdenińizder, oqyńyzdar jáne eń bastysy – mıkrofonnan qoryqpańyzdar! – dep túıindedi Gúlnaz Amanǵalı.

Buǵan deıin Beıjińdegi qazaq radıosynyń habar taratqanyna 54 jyl bolǵanyn jazǵan edik.