Radıo baǵdarlamalardyń bolashaǵy qandaı- maman pikiri
ASTANA. QazAqparat - Astanada tuńǵysh ret radıony damytý máselelerine arnalǵan «Radio Asia 2018» halyqaralyq konferentsııasy ótip jatyr, dep habarlaıdy QazAqparat tilshisi.
Oǵan Úndistan, Maldıv, Vetnam, Qytaı, Aýǵanstan, Túrikmenstan, Túrkııa, Indonezııa syndy Azııa elderiniń radıojýrnalısteri keldi.
«Radıonyń keleshegi óte zor. Jáne bul forým shyn máninde mańyzdy. Munda radıoındýstrııa ókilderimen jınalamyz jáne úzdik tájirıbelerdi ortaǵa salamyz. Bul kezdesýler bizdiń bilimimizdi tolyqtyra túsedi. Ásirese jas memleket bolyp sanalatyn Qazaqstan úshin, onyń jas medıasy úshin sarapshylardy ákelip, kemshilikterdi talqylaý sheshimi tezirek alǵa damýǵa múmkindik beredi», - dedi Ronnie Stanton Media kompanııasynyń basshysy Ronnı Stenton.
Onyń pikirinshe, radıonyń básekege qabiletti bolýy tutas álemniń ózekti máselesine aınaldy. Radıo óz áriptesterimen ǵana emes, YouTube, Facebook jelilerimen de aýdıtorııa úshin talasqa túsýge májbúr.
«Radıoónim shyǵaratyn kompanııalar kóp. Jalpy toptan erekshelenýdiń jolyn izdeý kerek. Bul oraıda, aýdıtorııa men kontentke zertteý júrgizý paıdaly. Sondaı-aq, radıostantsııa qyzmetkerleriniń qulshynysy da tabysqa jeteleıtin bir faktor bolyp sanalady. Bizde strategııalyq jospar, tsıfrlar men statıstıka bolýy múmkin. Biraq, bul jospardy óz isine berilgen mamandarsyz júzege asyra almaımyz. Máselen, tańǵy 4-te turyp, erteńgilik shoý baǵdarlamany júrgizetin adam óz isine senýi kerek, tyńdarmandardy sendire alatyn talantty bolýy kerek. Talanttar men túrli syn-qaterler týraly aıtqanda, menedjmentti de umytpaý kerek. Durys menedjment bolmasa, naryqta óz ornyńyzdy tabý qıynǵa soǵady», - dep keńes berdi Ronnı Stenton.
Aıta keteıik, elordanyń 20 jyldyq mereıtoıy qurmetine 10-12 shilde aralyǵynda Astanada «Azııa medıa dıalogy» jobasy aıasynda semınarlar men konferentsııalar ótedi.
Aıtýly shara sheńberinde Qazaqstanda tuńǵysh ret eń iri salalyq konferentsııalar ótedi jáne olardyń biri Azııa radıosyna arnalyp otyr. 12 shildede Azııa men Eýropa BAQ-taryna ortaq máselelerdi talqylaý úshin «Medıa-2020» konferentsııasy ótedi. Onda Aýstralııa, Belgııa, Germanııa, Japonııa, Qytaı, Eýropa men Azııanyń basqa da elderindegi jekemenshik jáne ulttyq teleradıokompanııalardyń basshylary moderator bolady.
Astananyń 20 jyldyǵyna arnalǵan taǵy bir erekshe syılyq - «ABU Radio Song Festival» halyqaralyq án festıvali bolmaq. Bul - «Eurovision» baıqaýynyń balamasy, munda Azııa-Tynyq muhıty elderiniń ónerpazdary baq synaıdy. Bıylǵy festıvalda da Úndistan, Maldıv, Vetnam, Qytaı, Aýǵanstan, Túrikmenstan, Túrkııa, Indonezııa elderinen jas ártister qatysady. Án baıqaýy «Qazmedıa ortalyǵynyń» kınokontsert zalynda ótedi. Kirý - tegin.
Astanaǵa keletin qurmetti qonaqtar tiziminde úkimettik emes medıauıymdardyń jetekshileri, Azııa-Tynyq muhıty jáne Jerorta teńizi elderiniń habar taratý qaýymdastyqtarynyń bas hatshylary, arab taratýshylar qaýymdastyǵynyń jetekshisi, eń úlken aýdıtorııasymen tanymal Úndistan radıosy syndy Azııa men Eýropanyń iri habar taratý kompanııalarynyń ókilderi bar. Osylaısha, Azııa-Tynyq muhıty elderiniń habar taratýshylar qaýymdastyǵynyń is-sharalary Qazaqstanda sharalar týrızmin damytýǵa baǵyttalǵan mańyzdy ımıdjdik jobalar bolmaq.
Azııa-Tynyq muhıty elderiniń habar taratýshylar qaýymdastyǵy - halyq tyǵyz ornalasqan Azııa men Okeanııanyń 69 elinen 292 habar taratýshyny biriktiretin kommertsııalyq emes iri kásipodaq, onyń aýdıtorııasy shamamen 3 mıllıard adamdy qamtıdy.
