Radıkaldy toptar qarapaıym halyqtyń mıyn ýlap jatyr
ALMATY. QazAqparat - «Qazaqstan Respýblıkasyndaǵy lańkestik jáne ekstremızm máselelerin zertteý ortalyǵy» QQ tóraǵasy, zań ǵylymdarynyń kandıdaty, professor Kákimjan Bıshmanov «Symbat» dızaın jáne tehnologııa akademııasynyń kolledj stýdenterimen kezdesti, dep habarlaıdy QazAqparat tilshisi.
Kákimjan Bıshmanov, «Symbat» dızaın jáne tehnologııa akademııasynyń kolledj stýdentterine dánı ekstremızm men terrorızmniń qaýpin túsindirdi.
«Terrorızm – eń qaýipti qylmys sanalady. Bul halyqaralyq sıpat alǵan qorqynyshty qubylys. Terrorızm ártúrli memleketter, toptar arasyndaǵy kelispeýshilikti sheshý úshin qorqytý jáne qyryp-joıýdyń quralyna aınalyp otyr. Terorlyq áreketter ártúrli bolýy múmkin, biraq onyń bárin biriktiretin eki túrli element bar. Birinshisi, terrorızm memlekettik bılikti kúıretýge baǵyttalǵan; ekinshisi maqsat – terrorızmdi júzege asyrý arqyly, ıaǵnı terrorısterdiń uıymdasqan, qatygezdik áreketterimen qarapaıym turǵyndardyń boıyna úreı uıalatý bolyp otyr»,- dedi Kákimjan Bıshmanov.
Onyń aıtýynsha, qazir búkil álem osy terrorızmen kúresip jatyr. Sonyń ishinde Qazaqstan da bar. Dinı terrorızm qaýpin boldyrmaý maqsatynda túrli is-sharalar qolǵa alyndy. Ekstremızm men terrorızmniń aldyn-alý jumystary Almatyda da qarqyndy júrip jatyr.
«Ókinishke oraı, terrorızm men ekstremızm bizdiń memeleketti de aınalyp ótpedi. Ol elimizdiń táýelizdigine, onyń qaýipsizdigi men qoǵamdyq tártipke úlken zııanyn tıgizedi. Ol ol ma, ekstremızm konstıtýtsııalyq qoǵamdy joıý nemese jaǵdaıdy ýshyqtyrý maqsatynda kóbinde dindi paıdalanady. Al sizder bilesizder eshqandaı din teris pıǵyldy quptamaıdy. Radıkaldy toptar qarapaıym halyqttyń mıyn ýlap jatyr. Sonyń jetegine kóbine ózderiń sııaqty jastar erip ketedi. Sondyqtan dinı ektremızm men terrorızmnen saq bolyńyzdar»,- deıdi «QR lańkestik jáne ekstremızm máselelerin zertteý ortalyǵy» QQ tóraǵasy K.Bıshmanov.
Bıshmanovtyń pikirinshe, áleýmettik jelilerdiń ashyqtyǵy, onda ekstremısttik sıpattaǵy habarlamalar men tyıym salynǵan ádebıetti ornalastyrý múmkindik týdyrady. Radıkaldy uıymdar óz jaqtastaryn ǵalamtordan taýyp júr.
«Osynda otyrǵan jastardyń barlyǵy 100% áleýmettik jelide otyrasyzdar. Túrli saıttarǵa da kiresizder. Oǵan eshkim tıym sala almaıdy. Desekte, kúmán týdyratyn saıttardan abaı bolyńyzdar. Dindi túsiný ońaı emes. Ol kóp bilimdi qajet etedi. Sondyqtan, ár nársege baıyppen qaraǵan jón. Siz bolmasańyzda qasyńyzdaǵy dosyńyz, kýrstasyńyz nemese týǵan týystaryńyzdyń bireýi osy jat aǵymnyń jetegine ketse, sol bir adam qanshama adamnyń obalyna qalýy múmkin»,- dep qosty Kákimjan Bıshmanov.
Kezdesýge kelgen jastardyń basym bóligi dinı ektremızm men terrorızmnen habardar bolyp shyqty. Olar professorǵa sáláfızm men vahhabızm degenimiz ne? «Dástúrli ıslam» jáne «Islamdyq radıkalızm» degen uǵymdar jaıly suraqtar qoıdy.
Bul saýaldarǵa Kákimjan Bıshmanov uǵynyqty tilmen jaýap berdi.
«Sóz sońynda aıtarym, sanaly da erkin bolyńyzdar, ózderińizdi aldaýǵa jol bermeńizder. Ómirge ashyq kózben qarap, onyń jolymen batyl aıaq basyp júrińizder»,- dep kezdesýdi qortyndylady.
