Radıkaldar «Parıj oqıǵasy» negizinde Máskeý men Qazaqstanda lańkestik jasaýdy josparlaǵan
ASTANA. QazAqparat - Qazaqstanda ustalǵan terrorıstik toptyń músheleri «Parıj oqıǵasy» negizinde Máskeý men Qazaqstanda lańkestik jasaýdy josparlaǵan. Bul týraly QR Ulttyq qaýipsizdik qyzmetiniń baspasóz qyzmetinen habarlady.
«Taǵy bir lańkestik top sheteldegi terrorısterdiń tapsyrmasy boıynsha 2015 jyldyń qarashasynda oryn alǵan «Parıj oqıǵasy» negizinde Máskeýde jáne Qazaqstan aýmaǵynda lańkestiktiń aýqymdy aktisin jasaýǵa nıettengen», - delingen habarlamada.
Vedomstvo aqparatyna qaraǵanda, aqpan aıynda atalǵan toptyń 5 adamy Astanada ustalyp, lańkestik is-qımylǵa qatysqandyǵy úshin sottalǵan. Olardyń qatarynda Qazaqstan, Reseı jáne Tájikstan azamattary bar.
«Ortalyq Azııa elderiniń 4 azamatynan jasaqtalǵan kelesi uıashyqtyń qyzmetine Máskeýde reseılik áriptester tosqaýyl qoıdy. Qylmyskerlerdiń Jeńis kúnin merekeleý ýaqytynda, Máskeýde lańkestik jasaýdy josparlaǵany anyqtaldy», - dep atap ótken QR UQK baspasóz qyzmetinen.
Komıtet málimetterine sáıkes, osy jyldyń basynan beri 4 tulǵanyń jáne 8 radıkaldy toptyń zańǵa qaıshy is-áreketine tosqaýyl qoıylǵan. Kózi joıylǵan toptardyń bir bóligi halyqaralyq lańkestik uıymdardyń sodyrlarynyń tikeleı basshylyǵymen jáne nusqaýymen áreket etken.
