Radek Vondrachek: Qazaqstan men Chehııany ortaq bolashaq baılanystyrady
ASTANA. KAZINFORM — Chehııa Respýblıkasy Parlamenti Ókilder palatasy Halyqaralyq ister komıtetiniń tóraǵasy, Chehııa–Qazaqstan parlamenttik dostyq tobynyń tóraǵasy Radek Vondrachek Qazaqstan men Chehııa arasyndaǵy parlamentaralyq baılanystardyń qazirgi deńgeıine joǵary baǵa berdi.
— Siz Chehııa–Qazaqstan parlamenttik dostyq tobynyń tóraǵasysyz. Búginde eki el arasyndaǵy parlamentaralyq baılanystar qandaı deńgeıde?
Bizdiń ekijaqty qarym-qatynastarymyzdyń tamyry tereńde jatyr. Biz osy dástúrli baılanysty sabaqtastyqpen jalǵastyryp qana qoımaı, ony jańa mazmunmen tolyqtyra túsýdemiz. Buǵan Chehııa Premer-mınıstriniń Qazaqstanǵa jaqynda jasaǵan sapary aıqyn mysal bola alady. Eki halyq arasynda shynaıy dostyq ornyqqanyn zor yqylaspen aıta alamyn. Bul — ótkinshi emes, ózara kóptegen kezdesý men jan-jaqty yntymaqtastyqqa negizdelgen berik dostyq. Eki el arasyndaǵy parlamentaralyq baılanystarǵa da oń baǵa beremin jáne olardyń odan ári damýyna aıryqsha mán beremin. Chehııa men Qazaqstandy dostyq yntymaqtastyqqa negizdelgen ortaq bolashaq baılanystyrady.
— Qazaqstan men Chehııa arasyndaǵy yntymaqtastyqty qaı salalarda damytýǵa múmkindik mol dep oılaısyz? Qazir qandaı baǵyttarǵa basymdyq berilip otyr?
Ekijaqty qatynastarymyzdyń deńgeıi edáýir joǵarylap, joǵary mamandandyrylǵan salalardaǵy yntymaqtastyqqa jol ashyldy. Atap aıtqanda, energetıka, ıadrolyq saladaǵy ǵylymı zertteýler men ázirlemeler, mashına jasaý, kólik jáne ekologııa baǵyttarynda ózara is-qımyldy keńeıtýge múmkindik mol. Chehııa men Qazaqstan endi tek protokoldyq kezdesýlermen shektelmeıdi. Jyly yqylaspen tabysqan qol alysýymyz dostyǵymyzdy ǵana emes, sonymen birge belsendi ári ózara tıimdi yntymaqtastyqty damytýǵa degen ortaq nıetimizdi de aıǵaqtady.
— Qazaqstanda jańa zań shyǵarýshy organ — Quryltaı depýtattaryn saılaý ótti. Osy saıası ózgeristerge jáne Qazaqstannyń damý baǵytyna qatysty qandaı pikir bildirer edińiz?
Qazaqstan — damý qarqyny aıryqsha el. Ol alǵa nyq qadam basyp keledi, alaıda bul úderis asyǵystyqpen emes, baıyppen ári senimdi túrde júzege asýda. Bul ustanym Qazaqstannyń syrtqy saıasatyna da tán. Qazaqstannyń halyqaralyq arenadaǵy orny erekshe — ol óz baǵytyn derbes aıqyndaıtyn egemen memleket jáne kóppolıarly álemniń jaýapty ári táýelsiz qatysýshysy. Sondyqtan Qazaqstandy Quryltaı depýtattarynyń saılaýyn tabysty ótkizýmen quttyqtaımyn. Osy tabysty baǵyttyń odan ári de nyǵaıa túsýine tilektespin jáne ózara yntymaqtastyǵymyzdyń aldaǵy ýaqytta odan ári damı beretinine zor úmit artamyn.
Aıta keteıik, sáýir aıynda Memleket basshysy Qasym-Jomart Toqaev pen Chehııa Premer-mınıstri Andreı Babısh kelissóz júrgizgenin jazǵanbyz. Sonymen qatar Prezıdent Chehııa Premer-mınıstrin І dárejeli «Dostyq» ordenimen marapattady.
Budan bólek, Qazaqstan – Chehııa bıznes forýmy aıasynda alty qujatqa qol qoıyldy.
