Radek Vondrachek: Qazaqstan men Chehııa arasynda sheshilmegen másele joq
- Vondrachek myrza, búginde Qazaqstan men Chehııa arasyndaǵy yntymaqtastyq qandaı baǵytta damyp keledi?
- Qazaqstan men Cheh Respýblıkasy arasyndaǵy ózara qarym-qatynas standarttan da joǵary jaqsy desek bolady. Bizde ashyq sheshilmegen eshqandaı másele joq. Sondyqtan bizdiń qarym-qatynasymyz óte jaqsy damyp keledi. Dál osy jaıtqa oraı elderimiz, parlamentarıılerimiz arasyndaǵy jaqsy ózara qarym-qatynasty naqtylaý úshin elderińizge keldim. Buǵan qosa, jaqsy dosym Nurlan Nyǵmatýlınmen jolyqtym. Óz kezeginde ótken jyly Májilis spıkeri Cheh Respýblıkasyna saparmen kelgenin atap ótkim keledi.
- Nur-Sultanǵa saparyńyzdyń maqsatyn aıtyp berseńiz jáne resmı saparyńyz barysynda qazaqstandyq tarappen qandaı máselelerdi talqyladyńyz?
- Bul saýalyńyzǵa jaýapty eki bólip bersem deımin. Birinshiden, bul shyndyǵynda, saıası maqsat. Biz Qazaqstanmen yntymaqtasqymyz keledi.
Eki el de saýda soǵystaryna, protektsıonızmge, qandaı da bir sanktsııalar nemese shekteýler engizýge qarsy shyǵady. Osy turǵydan alǵanda bizdiń elderimiz odaqtas sanalady. Sonymen qatar biz qazaqstandyq áriptesterimizden Parlamentter men naqty parlamentarııler arasyndaǵy yntymaqtastyqty keńeıtý jáne tereńdetý máselelerin talqyladyq.
Saparymnyń ekinshi maqsaty – bıznes salasyndaǵy qatynastardy nyǵaıtý. Cheh kásipkerleriniń sansyz delegatsııasyn ilestirip keldim. Chehııa bıznesmenderi bul saparǵa aıryqsha qyzyǵýshylyq tanytty. Osylaısha, Nur-Sultanda bıznes forým ótip, onyń aıasynda cheh kásipkerleri túrli baǵyttarda ózderine seriktes izdedi. Olardyń kelissózderdi qanshalyqty tabysty ótkize alǵanyn ázirshe bilmeımin. Degenmen, keıbireýleriniń sátti ótkenine jáne olar seriktes tapqandyǵyna senimim mol.
Elderimizdiń arasyndaǵy ózara ekonomıkalyq yntymaqtastyq únemi artyp keledi. Aıtalyq, osy jyly ózara taýar aınalymy 1 mlrd dollardan asyp jyǵylmaq.
- Dál qazirgi ýaqytta cheh bıznesi Qazaqstanda qanshalyqty belsendi jumys istep jatyr?
- Sizderdiń elderińizde barynsha jan-jaqty baǵyttaǵy alýan túrli kompanııalardyń ókilderi jumys isteıdi. Máselen, logıstıka men kólik salasynda. Ónerkásip salasyna kerekti túrli sorǵylardy jetkizýmen aınalysatyn kompanııalar da bar.
Menimen birge erekshe delegatsııa keldi. Olar - cheh shıpajaılarynyń ıeleri. Chehııada demalys úıleri men pansıonattar qazaqstandyq týrıster arasynda aıryqsha tanymaldyqqa ıe bolyp otyr. Qazaqstan Prezıdenti Qasym-Jomart Toqaev pen Májilis spıkeri Nurlan Nyǵmatýlın qazaqstandyqtardyń Karlovy Varyǵa barǵandy jaqsy kóretindigin rastady.
- Týrızm jaıynda sóz qozǵaǵannan keıin ózińizden cheh týrısterin Qazaqstanǵa kelý úshin qalaı qyzyqtyrýǵa bolatyndyǵyn bilsek...
- Ázirshe sizderdiń astanalaryńyz – Nur-Sultan qalasynda ǵana boldym. Biraq, qazirdiń ózinde Qazaqstannyń tabıǵaty keremet ekendigine senimim mol. Cheh týrısteri tabıǵatty óte joǵary baǵalaıdy. Menińshe, bul baǵytta týrıstik baılanystardy damytý, Qazaqstanǵa keletin cheh týrısteriniń sanyn arttyrý úshin úlken múmkinshilik bar dep oılaımyn. Árıne, buǵan ázirshe tek jaz aılarynda ǵana ushyp júrgen tikeleı reıster de septigin tıgize alady. Biraq, bul da Qazaqstan men Cheh Respýblıkasy arasynda tikeleı baılanys ornatýdyń tamasha múmkindigi.
- Taıaýda Nur-Sultanda Eýrazııa elderi Parlamentteri spıkerleriniń 4-keńesi ótti. Osynaý úlken parlamentaralyq sammıtke sizdiń memleketińizden Depýtattar palatasynyń vıtse-spıkeri Voıteh Fılıp qatysyp, sóz sóıleýi barysynda parlamentaralyq yntymaqtastyqtyń mańyzyn atap ótken bolatyn. Osy oraıda siz atalǵan sharaǵa qandaı baǵa berer edińiz?
- Keńeske qatysa almaǵanyma qatty ókinemin. Bul kezdesýge ózim kelip qatysýǵa nıet tanytqan bolatynmyn. Ony josparlap, shyn máninde osynda kelgim kelgen edi. Biraq, sol sátte Parlamentimizde óte mańyzdy daýys berý júrip jatty jáne men ushyp kete almadym. Sebebi meniń daýysym sheshýshi bolatyn. Degenmen, bizdiń Parlament tóraǵasynyń orynbasarynan ǵana emes, sonymen birge ózge de parlament ókilderinen óte jaqsy ári oń pikirler estidim. Osy aptanyń basynda Parlamentterdiń 60 spıkeri qatysqan Belgradtaǵy parlamentaralyq otyrysqa qatysqan edim. Olardyń barlyǵy da Nur-Sultandaǵy kezdesý jaıynda óte jaqsy pikirlerin bildirip jatyr.
- Suhbatyńyzǵa rahmet!
