RÁBIıA SULTAN BEGІM KESENESІ
Rábııa Sultan Begim kesenesi - ortaǵasyrlyq sáýlet óneri eskertkishi (HVǵ.). Qoja Ahmet Iasaýı kesenesiniń ońtústik-shyǵysynda 60 metr jerde ornalasqan.
Ámir Temirdiń nemeresi, Ulyqbektiń qyzy, Ábilqaıyr hannyń áıeli, belgili handar Kókenshi men Súıinishtiń anasy Rábııa Sultan Begimge arnaıy saldyrǵan. Alǵashynda segiz buryshty bir kameraly, tsılındr tárizdes barabanǵa bekitilgen bıik kúmbezi bar qurylys retinde salynyp, keıinnen kóp kameraly sharshy josparly qurylystarmen tolyqtyrylǵan. Kesene óte úlken sáýlettik keshenderdiń biri. Onyń quramyna bes úlken bólme kiredi. Keseneniń qas beti súıir ushty bıik eki tirek aralyǵynyń doǵa tárizdi jabyny túrinde jasalǵan, segiz buryshty zaly jáne osy zalǵa japsarlas salynǵan uzynsha kelgen tik buryshty eki úı-jaı bar. Keseneniń aınalasynan tabylǵan maıolıkalyq jáne jyltyratylǵan taqtaıshalarǵa qarap, onyń polıhromdy qaptamamen qaptalǵanyn kórýge bolady. Keseneniń ońtústik-shyǵys bóliginde jerasty qabirhanaǵa kiretin esik bar. Qabirhana sylanyp, boıalǵan. Onda terimen qaptalǵan aǵash tabyttar qoıylǵan.
Rábııa Sultan Begimniń tabytynda - «bul qudyretti Ámir Temir Kóregenniń uly, azapty ajaldan qaza tapqan, qudyretti, uly sultan Ulyqbek Gýragannyń qyzy, aqsúıek, (qudaı) keshirip, raqymshylyq jasaǵan, izgi jasandy Rábııa Sultan Begimniń tynyshtyq taýyp jatqan jeri» degen joldar bar.
Kesene túrkistandyq jergilikti sáýlettik dástúr negizinde salynǵan alǵashqy kesene retinde óte mańyzdy. 1980 jyldan bastap qaıtadan qalpyna keltirý jumystary júrgizilgen.
Derek kózi:
Ońtústik Qazaqstan entsıklopedııasy.
