R. Taýfıkov: Turǵyndardy, qorshaǵan ortany, sharýashylyq nysandaryn qorǵaý - memlekettik saıasattyń basymdyqty baǵyty
ALMATY. QazAqparat - Almatyda qala ákiminiń orynbasary Rýmıl Taýfıkovtyń tóraǵalyǵymen tótenshe jaǵdaılardyń aldyn alý jáne olardy joıý jónindegi Komıssııanyń otyrysy ótti.
Bul týraly búgin Almaty q. TJD baspasóz qyzmetinen habarlady.
Jıynǵa Komıssııa músheleri, Almaty qalasynyń aýdan ákimderi, Almaty q. TJD bastyǵy jáne azamattyq qorǵaý qyzmetteriniń basshylary qatysty.
Kún tártibinde «Suńqar» shańǵy tramplınderi keshenindegi tótenshe jaǵdaılardy eskertýde qoldanylyp jatqan sharalar», «2016 jylǵa arnalǵan Almaty qalasy ákimdiginiń janyndaǵy tótenshe jaǵdaılardyń aldyn alý jáne olardy joıýdaǵy Komıssııanyń Jumys josparyn bekitý» máseleleri qaraldy.
Óz sózinde qala ákiminiń orynbasary Almatynyń tótenshe jaǵdaılardyń oryn alý jaǵynan jalpyálemdik zańdylyqtan syrt qalmaıtyndyǵyn aıtty.
«Turǵyndardy qorshaǵan ortany, sharýashylyq nysandaryn dúleı apattardan qorǵaý jáne apat saldaryn joıý - memlekettik saıasattyń basymdyqty baǵyty. Sondyqtan, beıbit ómir men soǵys jaǵdaıyndaǵy tótenshe jaǵdaılardyń zardaptaryn joıý úshin mindetti túrde azamattyq qorǵaý kúshteri qurylady. Al olar jeke qurammen jáne tehnıkamen tolyqtaı jabdyqtalýy tıis», - dedi R. Taýfıkov.
Jıyn sońynda tótenshe jaǵdaılardyń týyndaýy jáne olardy joıý boıynsha atqarylǵan qyzmetter qorytyndylanyp, tıisti oryndarǵa birqatar tapsyrmalar berildi.
