R.T. Erdoǵan jemqorlyq daýyna baılanysty Túrkııanyń Premer-Mınıstri laýazymynan bas tartpaıtynyn málimdedi
ASTANA. 28 jeltoqsan. QazAqparat - Túrkııanyń Premer-Mınıstri Redjep Taıyp Erdoǵan eldegi jemqorlyq daýyna baılanysty óz qyzmetinen ketpeıtinin málimdedi. Osy oqıǵa bastalǵaly beri mınıstrler kabınetiniń 10 múshesi otstavkaǵa ketti, dep habarlady Bı-Bı-Sı.
Keshe Ystambuldyń Taksım alańynda úkimetke qarsy narazylyq aktsııasy ótti. Oǵan qatysýshylar «Uryny usta!» degen urandy jeleýletip, R.T.Erdoǵandy qyzmetinen ketýge shaqyrdy. Polıtsııa olarǵa qarsy kózden jas aǵyzatyn gaz ben rezeńke oqtar qoldandy.
18 jeltoqsan kúni Túrkııa polıtsııasy jemqorlyqqa qatysty aýqymdy shara ótkizdi. Ystambul men Ankarada 52 adam ustaldy, olardyń arasynda iskerler men keıbir mınıstrlerdiń balalary bolǵan. Bıznesmenderdi jemqorlyq, kontrabanda jáne esirtki zattaryn satty degen aıyppen qamaýǵa aldy. 25 jeltoqsan kúni qorshaǵan ortany qorǵaý jáne ýrbanızatsııa mınıstri Erdoǵan Baıraktar, Túrkııa ІІM basshysy Mýammer Gıýler men ekonomıka mınıstri Zafer Chaglaıan qyzmetten ketýge ótinish bildirdi. Osyǵan deıin tergeý barysynda sheneýnikterdiń uldary ustalǵan bolatyn. 26 jeltoqsan kúni Túrkııa prezıdenti Abdýlla Gúl eldiń mınıstrler kabınetiniń jańa quramyn bekitti. Ózgerister úkimettiń 10 vedomstvosyna qatysty boldy. Onyń ishinde janjalǵa baılanysty óz erikterimen qyzmetinen ketkender de bar.
R.T.Erdogan mınıstrlerge qarsy júrgizilgen tergeýdi onyń úkimetin dıskredıtatsııalaý úshin ádeıi jasalǵan qastandyq dep otyr. Premer eldiń «qastandyqpen» ushyrasqanyn jáne Túrkııany tutastyǵyna nuqsan keltirgisi keletinderdiń jazalanatynyn aıtty. ІІM birneshe joǵary shendi qyzmetkerleri oryndarynan ketti.
