Іri sheteldik kompanııalar qazaqstandyq qamtýdy arttyrýǵa múddeli emes — depýtat
ASTANA. KAZINFORM — Búgin Májiliste «Qazaqstannyń munaı-gaz óndirýshi kompanııalarynda jergilikti qamtýdy damytý máseleleri» taqyrybynda ótken jıynda depýtat Sergeı Ponomarev qazaqstandyq qamtýǵa qatysty ken ornyn paıdalanýshylardy synǵa aldy.
— Qazir kóptegen kelisimshartta, ıaǵnı ónimdi bólý týraly kelisimderde nemese jetildirilgen úlgilik kelisimsharttarda ónimge elishilik baǵanyń úlesin arttyrý boıynsha KPI engizildi. Bul rette, bıznes otandyq óndiristi damytýdy qoldaýdy jáne KPI-di engizýdi josparlap otyr ma? Sonymen qatar, jergilikti qamtý maqsattaryna jetý úshin óndiristik bloktaǵy satyp alý isimen aınalysatyn basshylardyń jaýapkershiligin belgileý eskerilgen be? , — dep surady Sergeı Ponomarev.
Óz kezeginde Energetıka vıtse-mınıstri Erlan Aqbarov qoldanystaǵy sharttarda taýarlar men qyzmetter boıynsha qazaqstandyq qamtý jóninde eń tómengi meje bekitilgenin aıtty.
— Qazirgi ýaqytta jer qoınaýyn paıdalanýshy qandaı da bir ózgerister engizgen saıyn, biz onyń deńgeıin múmkindiginshe birtindep kóterip jatyrmyz. Máselen, taýarlar boıynsha buryn 15% bolsa, qazir ony 20% etip belgilep jatyrmyz. Óıtkeni, Qazaqstan boıynsha taýarlarǵa qatysty ortasha kórsetkish shamamen 20 paıyz. Al qyzmetter men atqarylatyn jumystarǵa qatysty eshqandaı problema joq, — dedi vıtse-mınıstr.
Erlan Aqbarov jer qoınaýyn paıdalanýshylardyń basqarýshy quramyna KPI engizý týraly usynys pysyqtalyp jatqanyn aıtty. Energetıka mınıstrligi úsh iri kompanııaǵa osyndaı kórsetkishterdi belgileý týraly usynys hattar joldaǵan.
Osy oraıda depýtat Sergeı Ponomarev sheteldik kompanııalardyń is-qımylyna kóńili tolmaıtynyn atap ótti.
— Biz iri sheteldik kompanııalardy muqııat tyńdap shyqtyq. Olardyń qazaqstandyq qamtýdy arttyrýǵa eshqandaı múddesi joq ekenin baıqadyq. Eń kóbi — 7-18 paıyz (taýar boıynsha) shamasynda. Olar osyǵan deıin Parlament Májilisinde ótken kezdesýden keıin bul jumystardy júzege asyrý qajet ekenin túsindi. Al búgingi otyrys barysynda bıznes ókilderi qazaqstandyq qamtýdy arttyrýǵa nıet tanytyp otyr. Sondyqtan, endi qorytyndy jasap, bul jumysty jetildirip, kúsheıtý kerek, — dedi Májilis depýtaty.
Eske salsaq, munaı-gaz sektorynda qazaqstandyq qamtýdy damytý baǵytynda mınıstrlik jańa tetikter engizýdi josparlap otyrǵanyn jazǵan edik.