R.Otynbaeva 2011 jylǵy jeltoqsannyń 31-ine deıin Qyrǵyzstan prezıdenti qyzmetine taǵaıyndaldy
ASTANA. Mamyrdyń 19-y. QazAqparat - Qyrǵyzstannyń ýaqytsha úkimeti Roza Otynbaevany 2011 jylǵy jeltoqsannyń 31-ine deıin el prezıdenti etip taǵaıyndady. Ol sondaı-aq jańa úkimet qalyptasqanǵa deıin eldiń premer-mınıstri mindetin atqaratyn bolady. Eldiń revolıýtsııalyq ókimeti 2012 jylǵa deıin ótpeli kezeń dep jarııalaýǵa ýaǵdalasty, osy kezde elde ýaqytsha úkimettiń músheleriniń balamasyz daýys berýimen prezıdent tańdalady, dep habarlady RBK.
Ótpeli kezeńniń prezıdenti dekretke sáıkes saıası partııada bolmaýy jáne odan ári prezıdenttik laýazymǵa daýysqa túspeýi tıis.
Ýaqytsha prezıdent týraly tarmaq el konstıtýtsııasynyń jobasyna engizildi, ol búkilhalyqtyq referendýmǵa shyǵarylady.
Ýaqytsha prezıdent týraly dekretke sáıkes R.Otynbaevanyń negizgi mindeti prezıdenttik mindetterden basqa, jańa prezıdent jáne parlament saılaýlaryn ashyq jáne ádil ótkizýdi qamtamasyz etý bolmaq.
Saıası reformalar tusynda eldegi jaǵdaı óte tynyshsyz bolyp otyr. Búgin Jalalabadta jańa tártipsizdikter boldy, Qyrǵyzstan Densaýlyq saqtaý mınıstrliginiń málimetteri boıynsha 2 adam qaza boldy, taǵy 62 adam zardap shekti. Ózbek qaýymynyń kóshbasshysy Qadyrjan Batyrovtyń aqshasyna salynǵan Halyqtar dostyǵy ýnıversıtetiniń ǵımaraty janynda sherýshiler men kúzetshiler arasynda qaqtyǵys boldy. Mıtıngige qatysýshylardyń bir bóligi Jalalabad oblysy gýbernatorynyń mindetin atqarýshy Bektur Asanovtyń otstavkaǵa ketýin talap etti.
Sonyń nátıjesinde eldiń ýaqytsha úkimeti turaqsyz aımaqtar aýmaǵynda komendanttyq saǵat engizýge májbúr boldy. Komendanttyq saǵat Jalalabadta jáne Sozaq aýdanynda jergilikti ýaqytpen keshki saǵat 20:00-dan 6:00-ge deıin 2010 jylǵy maýsymnyń 1-ine deıin kúshinde bolady.
Roza Otynbaeva 1950 jyly Osh qalasynda týǵan. MMÝ fılosofııa fakýltetin jáne onyń janyndaǵy aspırantýrany btirdi. Fılosofııa ǵylymdarynyń kandıdaty.
1975-81 jyldary Qyrǵyz memlekettik ýnıversıtetinde sabaq berdi. Dıalektıkalyq materıalızm kafedrasynyń meńgerýshisi boldy.
1991 jyldan partııalyq jumysta. Frýnze (qazirgi Bishkek) qalasy KPSS qalalyq komıtetiniń ekinshi hatshysy boldy. 1986-1989 jyldary - Qyrǵyz KSR Mınıstrler keńesi tóraǵasynń orynbasary, respýblıkanyń syrtqy ister mınıstri.
1989-1991 jyldary R.Otynbaeva Máskeýge KSRO SІM ıÝNESKO jónindegi komıssııasynyń tóraıymy qyzmetine shaqyrylady.
Qyrǵyzstan KSRO quramynan shyqqannan keıin R.Otynbaeva respýblıkalyq bıliktiń basshy qyzmetterinde jumys jasady. Vıtse-premer boldy, birneshe ret eldiń SІM-in basqardy.
1992-1994 jyldary Qyrǵyzstannyń AQSh pen Kanadadaǵy elshisi.
1997 jyly úkimetten ketip, Ulybrıtanııa men Irlandııadaǵy elshi bolyp taǵaıyndaldy.
2002 jyly BUU Bas hatshysnyń grýzın-abhaz janjalyn retteý jónindegi arnaıy ókili bolyp taǵaıyndaldy.
2002 jyly qyrǵyz saıasatyna qaıta oralyp, «Ata-Jurt» oppozıtsııalyq qozǵalysyn qurdy.
2007 jylǵy jeltoqsannan Qyrǵyz parlamentiniń depýtaty, 2009 jylǵy qazannan - Qyrǵyzstan Sotsıal-demokratııalyq partııasy parlamenttik fraktsııasynyń jetekshisi.
Qyrǵyz prezıdenti qyrǵyz, orys, aǵylshyn jáne frantsýz tilderin meńgergen. R.Otynbaevanyń eki balasy - uly Qarashash jáne qyzy Ataıa bar. Kúıeýinen ajyrasqan.
