Іri nysandar úshin órtke qarsy saqtandyrý mindetteldi
ASTANA. KAZINFORM — 2025 jylǵy 24 maýsymda Memleket basshysy «Qazaqstan Respýblıkasynyń keıbir zańnamalyq aktilerine azamattyq qorǵaý, elektr energetıkasy jáne memlekettik múlikti basqarý máseleleri boıynsha ózgerister men tolyqtyrýlar engizý týraly» zańǵa qol qoıdy.
Sonymen birge kórsetilgen zańda adamdar jappaı jınalatyn obektiler ıeleriniń azamattyq-quqyqtyq jaýapkershiligin órtten júktelgen saqtandyrý engiziledi.
Aýmaǵy 2 000 sharshy metrden asatyn saýda kásiporyndary men oıyn-saýyq ortalyqtary sııaqty obektilerdiń ıeleri ózderiniń azamattyq-quqyqtyq jaýapkershiligin saqtandyrý shartyn jasasýǵa mindetti bolady. Obektilerdiń tolyq tizbesin Tótenshe jaǵdaılar mınıstrligi aıqyndaıdy.
— Saqtandyrý obektidegi órt saldarynan zardap shekken kelýshilerdiń, jalǵa alýshylardyń jáne ózge de adamdardyń ómirine, densaýlyǵyna jáne múlkine zııan keltirgeni úshin jaýapkershilikti óteıtin bolady. Bul rette jaýapkershilikti saqtandyrý sharty bolmaǵan kezde mundaı obektilerdiń qyzmetine jol berilmeıdi.
Nysannyń ıesinde osyndaı obektidegi órttiń saldarynan zardap shekken adamdardyń ómirine, densaýlyǵyna nemese múlkine keltirilgen zııandy óteý mindetiniń týyndaýy saqtandyrý jaǵdaıy dep tanylady, bul rette saqtandyrý jaǵdaıynyń bastalý faktisi taraptardyń kelisimimen ne sottyń sheshimimen saqtandyrýdyń úlgilik shartynyń talaptaryna sáıkes aıqyndalady, — delingen Qarjy naryǵyn retteý jáne damytý agenttigi habarlamasynda.
Saqtandyrý somasy saqtandyrý shartynda belgilenedi jáne keminde 75 myń AEK (295 mln teńge) bolýǵa tıis. Saqtandyrý syılyqaqysynyń mólsherin saqtandyrýshy aıqyndaıdy jáne ol saqtandyrý shartynda belgilenedi.
Bir jábirlenýshiniń múlkine zalal keltirgeni úshin saqtandyrý tóleminiń mólsheri keltirilgen zııan mólsherindegi somany quraıdy, biraq 1,5 myń AEK (5,9 mln teńge) aspaıdy.
Árbir jábirlenýshiniń ómiri men densaýlyǵyna keltirilgen zııan úshin saqtandyrý tóleminiń mólsheri:
— qaıtys bolǵan jaǵdaıda — 5 myń AEK (19,7 mln teńge);
— múgedektik belgileý:
I top — 4 myń AEK (15,7 mln teńge);
II top — 3 myń AEK (11,8 mln teńge);
III top — 1,5 myń AEK (5,9 mln teńge);
balaǵa — 3 myń AEK (11,8 mln teńge);
— múgedektik belgilenbeı mertigý, jaraqat alý nemese densaýlyqtyń ózge de zaqymdanýy — ambýlatorııalyq jáne (nemese) statsıonarlyq emdeýge jumsalatyn naqty shyǵystar mólsherinde, biraq 750 AEK-ten (2,9 mln teńge) aspaıtyn mólsherde.
Saqtandyrý sharty úlgilik saqtandyrý sharty negizinde Qarjy naryǵyn retteý jáne damytý agenttiginiń tıisti lıtsenzııasy bar jalpy saqtandyrý jónindegi kez kelgen 15 saqtandyrý uıymymen jasalýy múmkin.
Aıta ketelik áleýmettik osal toptaǵy úılerdiń 25%-ynda órtke qarsy datchık ornatylmaǵan.