Іri munaı tankerleri Ormýz buǵazyn aınalyp ótý úshin baǵytyn ózgertip jatyr
ASTANA. KAZINFORM – Árqaısysy shamamen 2 mıllıon barrel shıki munaı tasymaldaýǵa qabiletti eki sýpertanker Ormýz buǵazynda baǵytyn kúrt ózgertip, AQSh-tyń Iranǵa jasaǵan áýe shabýyldarynan keıin Parsy shyǵanaǵyndaǵy keme qatynasy táýekelge ushyraǵan soń, olardyń bireýi ǵana buǵazǵa qaıta oraldy.
AZERTAC agenttiginiń habarlaýynsha, Gonkongta tirkelgen Coswisdom Lake kemesi men AQSh-ta tirkelgen South Loyalty tankeri jeksenbi kúni Ormýz buǵazyna kirip, keıin kúrt baǵytyn ózgertken. Bul týraly Bloomberg agenttigi keme qozǵalysyn baqylaý derekterine silteme jasap habarlady. Birinshi keme ekinshi ret baǵytyn ózgertip, endi Ormýz buǵazy arqyly qaıta artqa bet alǵan. Al ekinshi keme dúısenbidegi sıgnaldaryna sáıkes, áli de Parsy shyǵanaǵyna kirmegen.
13 maýsymdaǵy Izraıldiń áýe soqqylarynan keıin Parsy shyǵanaǵyndaǵy kemelerdiń elektronıkasy men navıgatsııalyq sıgnaldaryna jıi kedergiler jasalýda.
Elektrondyq kedergiler men kemelerdiń Iran jaǵalaýynan aýlaq bolýǵa tyrysýyna qaramastan, AQSh shabýyldarynan keıin munaı jáne gaz tankerleri Ormýz buǵazy arqyly ótip jatyr. Baǵytyn ózgertken tankerler yqtımal marshrýt ózgerisiniń alǵashqy belgisi retinde qarastyrylyp jatyr.
Keme ıeleri men munaı saýdagerleri Taıaý Shyǵystaǵy shıelenistiń munaı tasymalyna áser etýi múmkin kez kelgen belgini muqııat qadaǵalap otyr.
Jeksenbi kúni Grekııanyń Keme qatynasy mınıstrligi óz eliniń keme ıelerine Ormýz buǵazy arqyly júrý josparlaryn qaıta qaraýdy jáne jaǵdaı turaqtalǵanǵa deıin qaýipsiz porttarda turaqtaýdy usynǵan habarlama jarııalady.
Bloomberg sarapshylary Ormýz buǵazynyń jabylýy — buryn-sońdy bolmaǵan qadam — jahandyq munaı jáne ekonomıkalyq daǵdarysqa alyp kelýi múmkin ekenin eskertedi. Munyń saldaryn tutynýshylar janarmaı quıý beketterine barǵan sátten bastap seze bastaıdy.
Eń tótenshe stsenarıı — Ormýz buǵazynyń tolyq jabylýy. Bul tar teńiz ótkeli Parsy shyǵanaǵyn Oman shyǵanaǵy jáne Úndi muhıtymen baılanystyrady. Dúnıejúzilik munaı saýdasynyń 20%-y jáne teńiz arqyly tasymaldanatyn munaıdyń 35%-y dál osy buǵaz arqyly ótedi. Buǵazdyń jabylýy Brent markaly munaıdyń baǵasyn 130 dollardan asyrýy múmkin, bul Eýropa úshin etalon bolyp tabylady jáne bul jaǵdaı birden jahandyq ınflıatsııaǵa áser etedi.
Aıta ketelik Iran parlamenti Ormýz buǵazyn jabýdy usynǵan edi.