Іri munaı-gaz jobalarynda otandyq taýarlar men qyzmetterge qoldaý kórsetiledi
ASTANA. KAZINFORM – Májilistiń Ekologııa máseleleri jáne tabıǵat paıdalaný komıteti Soltústik Kaspıı (Qashaǵan) jobasy boıynsha elishilik qundylyqty damytý jáne otandyq óndirýshilerdi qoldaý máselesin qarady.

QR Energetıka vıtse-mınıstri Qudaıbergen Arymbektiń aıtýynsha, iri munaı-gaz jobalarynda jer qoınaýyn paıdalaný maqsattarynda paıdalanylatyn taýarlardy, jumystar men kórsetiletin qyzmetterdi satyp alý kezindegi elishilik qundylyqty arttyrý jáne otandyq óndirýshilerdi qoldaý jumystary qolǵa alyndy.

− 2024 jyldyń qorytyndysy boıynsha «Nort Kaspıan Opereıtıng Kompanı N.V.» JShS (NCOC) jalpy kólemi 528,2 mlrd teńgege taýarlardy, jumystardy jáne kórsetiletin qyzmetterdi satyp alǵan. Onyń ishinde jergilikti qamtý úlesi 314,4 mlrd teńgeni nemese 59,5%-dy qurady. Atap aıtqanda, 7,57 mlrd teńgege taýar, 182,3 mlrd teńgege – jumys jáne 124,5 mlrd teńgege – kórsetiletin qyzmetter alǵan, − dedi Qudaıbergen Arymbek Májilistiń Ekologııa máseleleri jáne tabıǵat paıdalaný komıtetiniń otyrysynda.
2023 jylmen salystyrǵanda jumystardy satyp alý kólemi boıynsha jergilikti qamtý úlesi 2,4%-ǵa ósken. Alaıda 2023 jylmen salystyrǵanda taýarlardaǵy kórsetkish 24,3%-dan 15,5%-ǵa deıin tómendegen. Al 2024 jyly jumystardy satyp alýdyń jalpy kólemi – 246,3 mlrd teńge jáne barlyǵy qazaqstandyq jetkizýshiler. Kórsetiletin qyzmetterdi satyp alý kólemi 233,1 mlrd teńge bolsa, qazaqstandyq jetkizýshiler 124,5 mlrd teńgege qyzmet kórsetti.

– 2024 jyly NCOC-pen qol qoıylǵan otandyq taýar óndirýshilermen jáne jumystardy (kórsetiletin qyzmetterdi) jetkizýshilermen jalpy somasy shamamen 116,9 mln AQSh dollaryna 23 kelisimshart bekitildi. Onyń ishinde 4 mln AQSh dollaryn quraıtyn 2 ınvestıtsııaǵa aıyrbastaý kelisimsharty, 6 uzaqmerzimdi sharttar jáne «Synaq tapsyrystary» tetigi boıynsha jalpy somasy shamamen 112,9 mln AQSh dollaryna 15 kelisimshart (joǵary qysymdy klapandardy, gıdravlıkalyq klapandardy, optıkalyq kabelderdi jetkizý) jasaldy, - dep tolyqtyrdy Q.Arymbek.
2025 jylǵy 1 aqpannan bastap kúshine engen Tenderlik rásimderge engizilgen ózgerister men tolyqtyrýlar Qashaǵan jobasynyń satyp alýlaryna qazaqstandyq taýar óndirýshilerin tartý úshin mańyzdy qadam boldy. Olar jalǵyz jergilikti óndirýshiden satyp alý múmkindigin, jergilikti óndirýshiler arasynda tender ótkizýdi, ınvestıtsııalarǵa/uzaqmerzimdi kelisimsharttarǵa aıyrbastaý kelisimsharttaryn jasasýdy, jergilikti óndirýshilerge shartty jeńildikti ulǵaıtýdy kózdeıdi.
2024 jylǵy 18 jeltoqsanda NCOC taýarlardy, jumystardy jáne kórsetiletin qyzmetterdi jetkizýshiniń jáne tıisti sharttar jasalǵansha tenderlik protsesterdi qamtıtyn E-procurement elektrondy satyp alý júıesin iske qosty.
Sondaı-aq, 2024-2029 jyldarǵa arnalǵan taýarlardaǵy, jumystardaǵy jáne kórsetiletin qyzmetterdegi jergilikti qamtýdy damytý baǵdarlamasy kelisýdiń sońǵy satysynda tur.
Bul baǵdarlama taýarlardaǵy, jumystardaǵy jáne kórsetiletin qyzmetterdegi elishilik qundylyq úlesin jyl saıyn arttyrý (2029 jylǵa deıin taýarlarda 30%-ǵa deıin, jumystarda – 85%-ǵa deıin jáne kórsetiletin qyzmetterde – 75%-ǵa deıin) kózdelgen.
Buǵan deıin NCOC basqarýshy dırektory Djankarlo Rýıý Qashaǵan ken ornyndaǵy kompanııa jumysy týraly aıtyp bergen edi.