Іri kóterme bazarlarda «uıymdasqan toptar» zańsyz áreket etedi — Premer-mınıstr
ASTANA. KAZINFORM — Іri kóterme bazarlarda «uıymdasqan toptar» zańsyz áreket etedi. Bul týraly Úkimet otyrysynda Premer-mınıstr Oljas Bektenov aıtty.
— Saýda mınıstrligi kóterme-taratý ınfraqurylymyn damytý, zamanaýı saqtaý jáne logıstıka qýattaryn qurý jumystaryn jandandyrsyn. Áleýmettik mańyzy bar azyq-túlik taýarlaryna baǵanyń negizsiz ósýin tejeýge turaqty monıtorıng júrgizip, tıisti sharalar qabyldaýdy jalǵastyrý qajet. Sondaı-aq Saýda mınıstrligi óńirlermen birlesip, ishki naryqty otandyq ónimdermen tolyqtyrý, deldaldyq shemalardy anyqtaý jáne tsıfrlandyrý arqyly jetkizý tizbekterin qadaǵalaý jumystaryn kúsheıtsin, — dedi Úkimet basshysy.
Osy oraıda Oljas Bektenov Saýda mınıstri Arman Shaqqalıevke ótken aptada iri kóterme bazarlarda tártip ornatýdy tapsyrǵanyn eske saldy.
— Jasyratyny joq, ol jerlerde el aıtyp júrgendeı, «uıymdasqan toptar» zańsyz áreket etedi. Kókónis, jemis-jıdek, et jáne basqa da ónimderdiń baǵasy eshqandaı negizsiz, qoldan kóteriledi. Mine, osyny naǵyz deldaldyq shemalar dep aıtýǵa bolady. Arman Abaıuly, Іshki ister mınıstrligimen, Memlekettik kirister komıtetimen jáne Básekelestikti qorǵaý agenttigimen birge osy máselemen naqty ári júıeli túrde aınalysyńyz, — dedi Premer-mınıstr.
Buǵan deıin Oljas Bektenov kúrdeli syrtqy ekonomıkalyq ahýalǵa qaramastan shıkizattyq emes sektor básekege qabilettiligin kórsetkenin aıtqan edi.
