Іri qorlar Qazaqstannyń baǵaly qaǵazdaryna 800 mln dollar ınvestıtsııa quıdy
ASTANA. KAZINFORM — Ulttyq bank tóraǵasy Tımýr Súleımenov Úkimet otyrysynan keıin ótken baspasóz máslıhatynda teńge baǵamynyń nyǵaıýyna áser etip jatqan faktorlardy atady.
— Ulttyq bank te, basqa memlekettik organdar da valıýta baǵamyn basqaryp otyrǵan joq. Bizdiń baǵam usynys pen suranys negizinde qalyptasady. Keıingi aptadaǵy teńge baǵamynyń nyǵaıýy dollarǵa suranys azaıyp, usynys kóbeıgenimen baılanysty. Bul jerde qosymsha qazan aıynda bazalyq mólsherlemeni kótergenimizdi de bir faktor retinde aıta ketý kerek. Bazalyq mólsherlemeni kóterý arqyly teńge nomınalyndaǵy ónimderdi tartymdyraq ete aldyq. Bul ónimder halyqaralyq qaýymdastyq úshin tartymdyraq bola tústi. Qarjy mınıstrliginiń oblıgatsııalaryn 16 paıyzben satyp alý qandaı, 17,5 paıyzben satyp alý qandaı? Sáıkesinshe halyqaralyq portfeldik ınvestıtsııalar osy naryqqa umtylady. Ol ınvestıtsııalar dollar kúıinde quıylady. Qarjy mınıstrliginiń oblıgatsııasyn satyp alý úshin teńgemen tóleý kerek. Osylaısha teńgege suranys artyp, dollardyń usynysy ishki naryqta artty. Sonyń esebinen dollar baǵamy tómendeıdi, — dep túsindirdi ol.
Ulttyq bank basshysy baǵaly qaǵazdar naryǵynda jaǵymdy tendentsııa baıqalyp otyrǵanyn aıtady.
— Buǵan deıin Citigroup, Goldman Sachs sııaqty iri beırezıdent oıynshylar Qazaqstanyń baǵaly qaǵazdar naryǵynda ádettegideı 1 trln teńgeniń aktıvin nemese 2 mlrd dollardan astam aktıvti basqaryp kelse, qazir ol kórsetkish 2,8 mlrd dollarǵa jetti. Sonda iri ınvestıtsııalyq qorlardan qosymsha 800 mln dollardaı portfeldik ınvestıtsııa quıyldy. Olar da teńge baǵamynyń turaqtanýyna áser etip jatyr, — dedi Tımýr Súleımenov.
Aıta ketý kerek, búgin Úkimettiń, Ulttyq Banktiń jáne Qarjy naryǵyn retteý agenttiginiń makroekonomıkalyq turaqtandyrý jáne halyqtyń ál-aýqatyn arttyrý jónindegi 3 jyldyq birlesken is-qımyl baǵdarlamasy tanystyryldy.
Budan buryn Ulttyq bank tóraǵasy Tımýr Súleımenov Úkimet otyrysynda eldegi valıýta baǵamy suranys pen usynys negizinde qalyptasa beretinin aıtty. Biraq qajet bolǵan jaǵdaıda retteýshi organ retinde valıýta baǵamyna ınterventsııa arqyly áser etýge daıyn ekenderin atap ótti.