Іri kompanııalarda Qazaqstandaǵy óndirýshilerdi qoldaý úlesi ósti – Energetıka mınıstrligi
ASTANA. KAZINFORM - Energetıka vıtse-mınıstri Qudaıbergen Arymbek iri kompnııalarda ımportty almastyrý qarqynyna túsinik berdi.
- Memleket basshysy belgilegen mindetter sheńberinde iri munaı-gaz jobalarynda elishilik qundylyqty damytýdyń tıimdi júıesin qurýdy qamtamasyz etý barysynda mınıstrlik iri kompanııalardyń operatorlarymen, onyń ishinde QPO-men (Qarashyǵanaq Petrolıým Opereıtıng) birlesip jer qoınaýyn paıdalaný maqsattary úshin qoldanylatyn taýarlardy, jumystar men kórsetiletin qyzmetterdi satyp alý kezindegi elishilik qundylyqty arttyrý jáne otandyq óndirýshilerdi qoldaý boıynsha turaqty negizde jumysty jalǵastyryp otyr. 2024 jyldyń qorytyndysy boıynsha TShO, NKOK jáne QPO-nyń taýarlar men kórsetiletin qyzmetterdi jalpy satyp alý somasy 3,7 trln teńge boldy. Taýarlar, jumystar jáne kórsetiletin qyzmetterdegi jergilikti qamtýǵa 1,9 trln teńge tıesili. QPO úsh iri operator arasynda satyp alýdyń barlyq kóleminiń 16%-yn alyp otyr, - dedi Qudaıbergen Arymbek Májilistiń Ekologııa máseleleri jáne tabıǵat paıdalaný komıtetinde otandyq óndirýshilerdi qoldaý men ımportty almastyrý taqyrybyn talqylaý kezinde.
Onyń aıtýynsha, QPO-da 2023 jylmen salystyrǵanda taýarlardy, jumystardy jáne kórsetiletin qyzmetterdi satyp alý kólemi boıynsha jergilikti qamtý úlesiniń ósý serpini bar. Sonyń arasynda taýarlar boıynsha 2023 jylǵy 10,6%-dan 2024 jyly 18,2%-ǵa deıin aıtarlyqtaı ósim baıqaldy.
- 2024 jyldyń qorytyndysyna qaraǵanda, QPO-nyń taýarlardy, jumystardy jáne kórsetiletin qyzmetterdi satyp alýynyń jalpy kólemi 485,7 mlrd teńge boldy, onyń ishinde jergilikti qamtý úlesi 315 mlrd teńge somasyna 64,9 paıyzǵa jetti, - dedi vıtse-mınıstr.
Sonymen qatar ol 2024-2029 jyldarǵa arnalǵan taýarlardaǵy, jumystardaǵy jáne kórsetiletin qyzmetterdegi jergilikti qamtýdy damytýdyń bekitilgen baǵdarlamasyna toqtaldy. Bul baǵdarlama byltyr jeltoqsan aıynda qabyldandy. Osy rette taýarlardaǵy, jumystardaǵy jáne kórsetiletin qyzmetterdegi elishilik qundylyq úlesin arttyrý eskerilgen. ıAǵnı 2025 jyldan bastap taýarlar boıynsha 18%-dan 2029 jylǵa deıin 30 paıyzǵa jetkizý kerek.
Atap aıtqanda, Májilistegi otyrysta Qarashyǵanaq Petrolıým Opereıtıng bas dırektory Marko Marsılı Qazaqstandaǵy óndirýshilerdi qoldaý jumystaryna qatysty esep berdi.
Eske salsaq, byltyr kúzde Premer-mınıstr Oljas Bektenov Memleket basshysynyń otandyq kásipkerlik sýbektilerin memlekettik qoldaý sharalarynyń ashyqtyǵy men tıimdiligin arttyrýǵa qatysty tapsyrmalaryn oryndaý máselesi boıynsha jumys keńesin ótkizdi.