Іri kásiporyndardyń salyq túsimderi 37 paıyzǵa azaıdy – Qarjy mınıstri
ASTANA. KAZINFORM — Bıyl 11 aıda memlekettik bıýdjet kiristeri 21,9 trln teńgege jetti. Bul týraly búgin Úkimet otyrysynda Qarjy mınıstri Mádı Tákıev aıtty.
- Jalpy alǵanda nátıjeler bıýdjet júıesiniń ornyqtylyǵyn, syrtqy faktorlardyń qysymy men álemdik ekonomıkanyń turaqsyzdyǵyna qaramastan memleket barlyq mindettemesin qamtamasyz etýge qabilettiligin kórsetip otyr. Memlekettik bıýdjet kiristeri 21,9 trln teńgeni nemese josparǵa 100,1 paıyzdy qurady. Ótken jyldyń osy kezeńimen salystyrǵanda 2,9 trln teńge ósim kórsetti. Respýblıkalyq bıýdjet kiristeri 13,6 trln teńgege jetip, ósim 1,8 trln teńgeni qurady, 98 paıyz atqaryldy, - dedi mınıstr.
Onyń aıtýynsha, jergilikti bıýdjet túsimderdiń turaqty serpinin qamtamasyz etti. 11 aıda 384 mlrd teńgeden asyra oryndalyp, 8,2 trln teńge boldy.
- Álemdik munaı baǵasynyń ótken jylmen salystyrǵanda 12 AQSh dollaryna jáne boljamdy deńgeıden 5,4 dollarǵa tómendeýi, eksporttyń 3,8 paıyzǵa qysqarýy iri kásiporyndardan túsetin salyq túsimderiniń 37 paıyzǵa azaıýyna ákep soqty. Osy syrtqy faktorlarǵa qaramastan, kirister parametriniń turaqtylyǵy saqtalýda jáne atqarylýyn boljaýǵa múmkindik beredi.
Osylaısha barlyq memlekettik mindettemeler — áleýmettik tólemder, jalaqylar, óńirlerge transfertter, damý baǵdarlamalary atqarylatyn bolady, - dedi Mádı Tákıev.
Aıta keteıik, bıylǵy qańtar-qarashanyń qorytyndysy boıynsha ekonomıkanyń ósimi 6,4 paıyzdy qurady.
