R. Káribjanova: Májilis depýtattaryn merziminen buryn saılaý - elimizde parlamentarızmdi damytýdyń jańa belesi

ALMATY. QazAqparat - Májilis depýtattarynyń parlamenttik saılaýdy merziminen buryn ótkizý týraly bastamasy qazaqstandyqtardyń saıası kemeldiliginiń joǵary ekendigin bildiredi, - dep sanaıdy «Ǵylym ordasy» RMK bas dırektory Roza Káribjanova.

«Álemdik qarjy daǵdarysy Qazaqstannyń áleýmettik-ekonomıkalyq jaǵdaıyna áser etpeı qoıǵan joq. Qazir, bizdiń el úshin jańa saıası kezeń bastalyp kele jatyr. Aldymyzda álemdegi eń damyǵan 30 eldiń qataryna ený mindeti tur. Bul úshin Elbasy Ult jospary dep atalatyn «100 naqty qadamdy» usyndy», - dedi R. Káribjanova.

Ol sonymen qatar, QR Parlamenti Májilisiniń qazirgi shaqyrylymy ǵalamat jumystar atqarǵandyǵyn aıtty. Bes ınstıtýtsıonaldyq reformany júzege asyrý maqsatynda Parlament qabyrǵasynda óte mańyzdy zańdar qabyldandy.

«Endi meniń oıymsha, bul atalǵan reformalardyń júzege asýyn qamtamasyz etý úshin Májiliske jańa adamdar kelýi kerek dep oılaımyn. Sol úshin de bul saılaýdy - elimizdegi parlamentarızmdi damytýdyń jańa tarıhı belesi dep sanaımyn. Onyń ústine Májilis pen máslıhattar saılaýyn qatar ótkizý - bıýdjet qarjysyn únemdeýge múmkindik beredi», - dedi R. Káribjanova.