Іri qara men usaq maldy eksporttaýǵa ýaqytsha tyıym salyndy

ASTANA. KAZINFORM – Ýaqytsha tyıym asyl tuqymdy maldyń jappaı eksportyna jol bermeý maqsatynda engizildi. Bul týraly Aýyl sharýashylyǵy mınıstrliginiń baspasóz qyzmeti habarlady.

— Syrtqy saýda qyzmeti jáne Halyqaralyq ekonomıkalyq uıymdarǵa qatysý máseleleri jónindegi vedomstvoaralyq komıssııanyń (VAK) 2025 jylǵy 12 naýryzdaǵy otyrysynda Qazaqstan Respýblıkasynyń aýmaǵynan iri qara maldyń (ІQM) jáne usaq maldyń (UM) analyq basyn áketýge tyıym salýdy alty aı merzimge uzartý maquldandy, — delingen habarlamada.

Osyǵan baılanysty, Aýyl sharýashylyǵy mınıstrliginiń 4 sáýirdegi jáne Qarjy mınıstrliginiń 7 sáýirdegi  «Aýyl sharýashylyǵy janýarlaryn áketýdiń keıbir máseleleri týraly» birlesken buıryǵy qabyldandy.

Aıta keteıik, ýaqytsha tyıym jappaı eksportqa jol bermeý jáne aýylsharýashylyq janýarlarynyń sanynyń turaqty ósýin qamtamasyz etý maqsatynda engizilgen.

2024 jylǵy 14 qyrkúıekten bastap 2025 jylǵy 14 naýryzǵa deıin 6 aı merzimge ІQM jáne UM analyq basyn áketýge tyıym salynǵan.

Buıryq 2025 jylǵy 10 sáýirde kúshine enedi.