Іri qara mal terisiniń 78%-y óńdelmeıdi: sheshim qandaı

ASTANA. KAZINFORM — Aýyl sharýashylyǵy mınıstrligi elimizde teri óńdeý men ony eksporttaýǵa qatysty túsinik berdi.

- Qazaqstandaǵy teri óńdeý naryǵynyń qazirgi jaı-kúıine toqtalsaq, 2023 jyldyń qorytyndysy boıynsha 2 548,5 myń ІQM terisi óndirildi. Onyń 8 paıyzy (208,3 myńy) qaıta óńdeýge jiberilgen, al 13,7 paıyzy (349,6 myńy) Reseıge, Túrkııaǵa, Qyrǵyzstanǵa, Nıgerııaǵa eksporttaldy jáne 4,5 myń teri Reseı Federatsııasynan ımporttalǵan, - delingen mınıstrliktiń Kazinform agenttigine bergen jaýabynda.

Atap aıtqanda, teriniń 78 paıyzy (1 997,1 myńy) óńdelmegen qaldyq kúıinde qalǵan. Osylaısha, ІQM teri shıkizatynyń 8 paıyzy ǵana óńdeledi, ıaǵnı shıkizat kólemi salanyń óńdeý men ótkizý múmkindiginen aıtarlyqtaı joǵary.

Respýblıkada terini bastapqy óńdeıtin 9 kásiporyn jumys isteıdi. Óńdeýshi kásiporyndardyń qýattylyǵy 3,3 mln-ǵa deıin iri qara mal terisin, usaq maldyń 4 mln-nan astam terisin óńdeýge múmkindik beredi. 2023 jyly olardyń júktelýi 6,3% boldy. 

- Teri óńdeý salasynyń damýyn tejep turǵan sebepterge keletin bolsaq, olarǵa kásiporyndardyń aınalym qarajatynyń tapshylyǵy, óndirilgen ónimdi ótkizý naryqtarynyń shekteýligi, sapaly shıkizattyń jetkiliksizdigi jatady. Aýyl sharýashylyǵy ónimderin óńdeýdi damytý jónindegi 2024-2028 jyldarǵa arnalǵan keshendi josparda teri óńdeýshi kásiporyndarǵa shıkizatpen qamtamasyz etý maqsatynda 200-den astam mal terisin daıyndaıtyn ári jınaıtyn pýnkter ashý jáne memlekettik qoldaý sharalaryn jetildirý qarastyrylǵan. Odan bólek, Keshendi jospar aıasynda terini tereńdete óńdeý boıynsha ınvestıtsııalyq jobalardy júzege asyrý kózelgen jáne ony yntalandyrý úshin jańa kásiporyndardy salý, sondaı-aq jumys istep turǵandaryn jańǵyrtý kezinde mal terilerin óńdeý kásiporyndarynyń shyǵyndaryn óteý kózdelgen. Investıtsııalyq salymnyń óteý úlesi 25%, - dep atalyp ótken vedomstvo aqparatynda. 

Budan basqa, Keshendi jospar boıynsha qaıta óńdeýshi kásiporyndarǵa (sonyń ishinde terini óńdeıtin kásiporyndarǵa) negizgi jáne aınalym qarajatty tolyqtyrý úshin jeńildetilgen nesıe berý qarastyrylǵan. 

- Atalǵan sharalar teri-jún óńdeý kásiporyndarynyń jumysyna oń yqpalyn tıgizip, qazirgi kezde bolyp otyrǵan negizgi máselelerdi sheshýge múmkindik beredi, - delingen Aýyl sharýashylyǵy mınıstrligi málimetinde. 

Eske salsaq, byltyr Qazaqstan men Ózbekstan kásiporyndary teri óńdeý salasynda áriptestik ornatatynyn jazǵan edik.