Іri qalalarǵa avtokólikterdiń kirýine shekteý qoıylmaıdy — Roman Sklıar

ASTANA. KAZINFORM — Qazaqstannyń iri qalalaryna avtokólikterdiń kirýin shekteý ázirge josparlanyp otyrǵan joq. Bul týraly QR Premer-Mınıstriniń birinshi orynbasary Roman Sklıar Úkimettegi baspasóz máslıhatynda aıtty. 

Onyń aıtýynsha, kóliktiń qorshaǵan ortany lastaý máselesi rasymen ózekti jáne bul eń aldymen, eldegi avtoparktiń eskirýimen baılanysty.

— Mundaı másele bar. Jalpy, bul kólikterdiń eskirýimen baılanysty. Eski kólikter qorshaǵan ortany kóbirek lastaıdy, — dedi Roman Sklıar.

R. Sklıar memlekettiń avtoparkti jańartýdy jáne ekologııalyq taza kólik túrlerin damytýdy yntalandyrýdy jalǵastyratynyn atap ótti.

— Memleket jańa avtokólikterdi satyp alýdy yntalandyrýdy jalǵastyrady. Aqyly joldar men benzınge salynatyn salyqtar azamattardy qoǵamdyq kólikke otyrýǵa kóbirek yntalandyrady. Qoǵamdyq kólikti gaz otynyna kóshirý jáne jańa elektr avtobýstaryn satyp alý jumystaryn jalǵastyramyz, — dedi birinshi vıtse-premer. 

Sonymen qatar, ol jeke avtokólikterdiń iri qalalarǵa kirýine shekteý engizý josparda joq ekenin basa aıtty.

— Qazirgi ýaqytta iri qalalarǵa kóliktiń kirýine eshqandaı shekteý qoıý josparlanyp otyrǵan joq, — dedi R. Sklıar.

Buǵan deıin Premer-mınıstrdiń birinshi orynbasary Roman Sklıar Táýelsizdik saraıyndaǵy «Ortalyq Azııa-Qytaı» sammıtiniń kýlýarynda Qytaı kólikteriniń sapasy týraly pikir bildirdi.