Іri qalalarda sýsyz otyrǵan halyq bar – qaıtarylǵan aktıvter esebinen qubyr tartylyp jatyr
ASTANA. KAZINFORM – Qazaqstanda zańsyz ıemdenilgen aktıvterdi qaıtarý nátıjesi memleketke túsken qarajatpen ǵana ólshenbeıdi. Qaıtarylǵan aktıvterdiń esebinen aýyldarǵa aýyz sý tartylyp, áleýmettik nysandar salynyp, ınvestıtsııalyq jobalar iske asyrylýda.
Bul týraly QR Bas prokýratýrasy Aktıvterdi qaıtarý qyzmetiniń basshysy Nurdáýlet Súıindikov «Bizdin orta» podkastynda aıtty.
Onyń aıtýynsha, memleketke aqshalaı qarajatpen qatar jyljymaıtyn jáne kommertsııalyq múlik, kásiporyndardaǵy úlester, baǵaly zattar, zergerlik buıymdar jáne basqa da aktıvter qaıtarylǵan.
– Qazirgi ýaqytta memleket kirisine naqty qaıtarylǵan aktıvterdiń kólemi shamamen 1,3 trln teńgeni quraıdy. Buǵan qosa, zań sýbektileri Qazaqstanda ınvestıtsııalyq jáne áleýmettik jobalardy iske asyrýǵa 5,2 trln teńge kóleminde mindetteme qabyldaǵan. Osylaısha, memleketke qaıtarylǵan jáne el ekonomıkasyna baǵyttalǵan aktıvterdiń jalpy kólemi 6,5 trln teńgege jýyqtaıdy, – dedi spıker.
Nurdáýlet Súıindikov osy ýaqytqa deıin memleketke qaıtarylǵan eń iri aktıvterdiń biri shamamen jarty mıllıard dollar kólemindegi aqshalaı qarajat bolǵanyn atap ótti. Bul shamamen 220 mlrd teńgege teń.
Aktıviniń zańsyz jolmen alynǵanyn moıyndamaǵan nemese ony memleketke erikti túrde qaıtarýǵa kelispegen tulǵalardyń máselesi sot arqyly sheshiledi.
Eger sotta aktıvtiń zańdy jolmen alynǵany dáleldenbese, ol memleket kirisine beriledi. Spıkerdiń aıtýynsha, osyndaı sot sheshimderi negizinde 100 mlrd teńgeden astam aktıv memleketke májbúrli túrde qaıtarylǵan.
Bas prokýratýra ókili aktıvterdi qaıtarýdyń naqty nátıjesi azamattardyń kúndelikti ómirinen kórinetinin aıtty.
– Naqty nátıje mektepte bilim alyp jatqan bala, emhanada em qabyldaǵan naýqas, sport zalynda jattyǵyp júrgen jasóspirim nemese úıindegi krannan alǵash ret sý ishken aýyl turǵynynyń sezimimen ólshenedi, – dedi Nurdáýlet Súıindikov.
Onyń aıtýynsha, qaıtarylǵan aktıvter esebinen 200-den astam aýyl aýyz sýmen qamtyldy.
– Sý tapshylyǵy aýylda ǵana emes, respýblıkalyq mańyzy bar qalalarda da ózekti másele bolyp otyr. Tipti Almaty qalasynyń birneshe yqshamaýdanynda sý joq. Aktıvter esebinen Tarazdyń yqshamaýdandaryna sý ótkizip berdik. Mundaı jobalar bıýdjetke túsetin júktemeni azaıtady, – dedi ol.
Jalpy, qaıtarylǵan aktıvter esebinen 467 jobany qarjylandyrýǵa qarajat bólingen, onyń 378-i aıaqtalǵan. Tipti, jobalardyń basym bóligi belgilengen merzimde salynyp, paıdalanýǵa berilgen. Sonymen qatar jobalardy iske asyrý barysynda 6,5 mlrd teńge únemdelip, arnaıy memlekettik qorǵa qaıtarylǵan.
Bul qarajat jańa áleýmettik jobalardy, sonyń ishinde aýyldarǵa sý tartý, balabaqshalar men feldsherlik-akýsherlik pýnktter salý sııaqty jumystardy qarjylandyrýǵa baǵyttalýy múmkin.
Buǵan deıin N. Súıindikov Qazaqstanda adamnyń aýqatty bolýy onyń aktıvterin memleket avtomatty túrde tekserýdi bildirmeıtinin aıtqan edi.
Podkast qonaǵynyń tolyq suhbatyn myna jerden oqýǵa bolady.
