Іri qalalarda qoǵamdyq kólikti damytý úshin ne kerek
ASTANA. KAZINFORM – Sheneýnikter qoǵamdyq kólikti keńinen paıdalanýda ózderi úlgi bolýy tıis. Bul týraly BIZDIÑ ORTA podkastynda Astana qalasy ýrbanıstıka ortalyǵynyń aǵa ýrbanısi Nurqoja Baýyrjanuly málim etti.
- Ár adam óz kóliginde otyrǵysy keledi. Bir sheteldik azamattyń maǵan aıtqany bar: «osy Qazaqstanǵa kelseń, 10 adam jınalsa, 10 kólikpen keledi» deıdi. Ol ras negizi, shyndyqqa janasady. Bizde ár adam óz kóligimen júrýge tyrysady, soǵan 18 jasynan bastap umtylady. Osy jerde bizge kishkene halyq sanasyn ózgertip, qoǵamdyq kóliktiń tıimdi ári jaqsy ekenin túsindirý kerek dep oılaımyn. Qoǵamdyq kólikti turǵyndar kóbirek qoldanýy kerek. Sol kezde ekologııa da durystalady, kólikterdiń gazdary azaıady. Bizde elektr energııasymen júretin qoǵamdyq kólikter bar. Eger de basshylyqtaǵy adamdar qoǵamdyq kólikpen júrýdi norma etip kórsetip, sony ózderi qabyldasa, sol kezde tıisti nátıje bolady dep sanaımyn, - dedi Nurqoja Baýyrjanuly.
Onyń aıtýynsha, qoǵamdyq kólik júıesiniń damýy úlken qalalardaǵy keptelistiń máselesin sheshýge aıtarlyqtaı yqpal etedi.
- Mysaly, joldaǵy eki jeńil kólik bir qoǵamdyq kóliktiń ornyn alyp turady. Bizdiń elde úlken kólikterdi jaqsy kóredi ǵoı, jańaǵy pıkap nemese jol talǵamaıtyn basqa da avtokólikter barshylyq. Neǵurlym kólik úlken bolǵan saıyn, adam soǵurlym ózin jaqsy sezinedi. Endi bul psıhologııany sál ózgertip, adamdardy qoǵamdyq kólikke otyrǵyzsaq, sol durys bolady. Qoǵamdyq kóliktiń sanyn kóbeıtý - ol másele emes. Turǵyndar kóbeıgen saıyn qoǵamdyq kólik sany kóbeıedi. Bul jerde másele — qoǵamdyq kólikke otyrǵysy keletin adamdar az... Eýropada tipti sheneýnikter de, úlken kásipkerler de velosıpedpen júredi. Astanada velosıped joldar jaqsy damyp keledi. Velosıped joldarmen ǵana qalany aralap júrýge bolady. Óte ádemi jasalǵan, óte yńǵaıly. Almatyda da velosıped joldary jaqsy damyǵan. Jazda velosıpedpen júrse, ol densaýlyqqa da paıdaly, - dedi maman.
Buǵan deıin habarlanǵandaı, Qyzylordada qoǵamdyq kólikterge jasandy ıntellekt júıesi ornatylyp jatyr.
