Іri halyqaralyq kompanııa Alatau City jobasyna ınvestıtsııa salýǵa nıetti
ASTANA. KAZINFORM — Oljas Bektenov Melco Resorts & Entertainment basshysy Loýrens Homen Alatau city damytý aıasyndaǵy yntymaqtastyq máselelerin talqylady. Bul týraly Úkimettiń baspasóz qyzmeti habarlady.
Premer-mınıstr Oljas Bektenov Melco Resorts & Entertainment Limited halyqaralyq kompanııasynyń tóraǵasy jáne bas atqarýshy dırektory Loýrens Homen kezdesti.
Zamanaýı týrıstik ındýstrııany damytý — ekonomıkany ártaraptandyrý, ınvestıtsııa tartý jáne ekonomıkalyq ósýdiń jańa baǵdaryn qalyptastyrý jónindegi memlekettik saıasattyń basym baǵyttarynyń biri.
Kezdesý barysynda Qazaqstannyń týrıstik ınfraqurylymyn damytý salasyndaǵy yntymaqtastyq perspektıvalary, sondaı-aq Alataý qalasynyń aýmaǵynda jobalardy júzege asyrýǵa ınvestorlardyń qatysý múmkindikteri talqylandy.
Premer-mınıstr Prezıdenttiń Alatau City jobasyn júzege asyrýǵa jáne oǵan qajetti ınfraqurylymdardy salýǵa basa nazar aýdaryp otyrǵanyn atap ótti. 2026 jylǵy 1 shildeden bastap jańa Konstıtýtsııa, sondaı-aq «Alataý qalasynyń arnaýly quqyqtyq rejımi týraly» Konstıtýtsııalyq zań kúshine enedi. Zańda ınvestorlarmen ózara is-qımyldyń ashyq tetikteri, ınvestıtsııalyq jobalardy júzege asyrý jaǵdaılarynyń uzaqmerzimdi turaqtylyǵy jáne ınvestıtsııalardy qorǵaýdyń qazirgi zamanǵy tetikteri kózdelgen.
«Melco Resorts & Entertainment Limited» basqarma tóraǵasy Loýrens Ho kompanııanyń birlesken jobalardy júzege asyrýǵa múddeliligin bildirip, Qazaqstannyń týrızm men qonaqjaılylyq ındýstrııasyn damytýda joǵary áleýetke ıe ekenin atap ótti.
Kezdesý qorytyndysy boıynsha taraptar zamanaýı týrıstik ınfraqurylymdy damytý máseleleri boıynsha yntymaqtastyqty odan ári jalǵastyrýǵa qyzyǵýshylyq tanytty.
Anyqtama:
Melco Resorts & Entertainment Limited — ıntegratsııalanǵan ınfraqurylymdyq keshenderdiń iri halyqaralyq operatorlarynyń biri. Kompanııa týrıstik, qonaq úı men MICE-ınfraqurylymyn damyta otyryp, Makao, Fılıppın jáne Kıprdegi jobalardy júzege asyrady.
