Іri frantsýz korporatsııasy Qazaqstanda sý burý, sý jáne jylýmen jabdyqtaý júıesin jańǵyrtýǵa qatysýǵa daıyn
ASTANA. KAZINFORM – Premer-mınıstrdiń orynbasary Qanat Bozymbaev Veolia kompanııasynyń basshylyǵymen kezdesý ótkizdi. Kelissózge Qazaqstan men Frantsııanyń dıplomatııalyq qurylymdary, TKSh salasyndaǵy memlekettik organdar men ákimdikterdiń ókilderi qatysty. Bul týraly Úkimettiń baspasóz qyzmeti habarlady.
Veolia kompanııasy – sýmen jabdyqtaý jáne tazartý, qaldyqtardy óńdeý, ekologııalyq qyzmet kórsetý salasynda álemdik kóshbasshylardyń biri. Búginde 100-den astam elde jobalardy júzege asyryp keledi. Veolia Qazaqstandy ornyqty sýmen qamtý men kommýnaldyq ınfraqurylymdy jańǵyrtý turǵysynan áleýetti naryq retinde qarastyryp otyr. Sonymen qatar kompanııa sý salasyndaǵy jobalarǵa, ortalyqtandyrylǵan jylýmen jabdyqtaý nysandaryn paıdalaný jáne jańǵyrtý jumystaryna qatysý múmkindigin zerttep jatyr.
Kezdesý barysynda Qanat Bozymbaev Memleket basshysy qoıǵan negizgi ınfraqurylymdyq mindetterdi atap ótti. Ol iske asyrylyp jatqan «Energetıkalyq jáne kommýnaldyq sektorlardy jańǵyrtý» ulttyq jobasy aıasynda 4,7 myń km sý qubyry, 2,6 myń km káriz jelileri jańartylyp, elimizdiń barlyq iri qalalarynda 38 káriz-tazartý nysany salynatynyn jetkizdi.
Kelissózder qorytyndysy boıynsha taraptar qysqa merzim ishinde basymdyq beriletin aımaqtar men nysandardy aıqyndaıtyn birlesken jumys tobyn qurýǵa ýaǵdalasty.
Aıta keteıik, Aqmola oblysynda sýmen jabdyqtaý jelilerin salýǵa zańsyz aktıvter esebinen 21,5 mlrd teńge bólindi.