R. Erdoǵan túrik depýtattarynyń qol suǵylmaýshylyq quqyǵyn shektedi
ASTANA. QazAqparat - Túrkııa Prezıdenti Redjep Taıyp Erdoǵan depýtattardy qylmystyq qol suǵylmaýshylyq quqyǵynan aıyrý týraly jarlyqqa qol qoıdy. Bul zań oppozıtsııalyq Halyqtar demokratııalyq partııasynyń (HDP) birqatar depýtatyna qatysty sot protsesin júrgizýge jol ashady. Prezıdent bul partııany Túrkııada tyıym salynǵan «Kúrdistan jumys» partııasynyń bóligi dep esepteıdi, dep habarlady VVS agenttigi.
«Reıter» agenttiginiń aqparatynda parlamenttiń 138 múshesine qatysty qylmystyq is qozǵalyp, tergeý amaldary júrgizilip jatqany habarlanǵan. Alaıda, osyǵan deıin olardy sottaý múmkin bolmady. 138 depýtattyń 101-i eki iri oppozıtsııalyq partııanyń - HDP jáne solshyl-tsentrıstik Halyqtyq-respýblıkalyq partııasynyń músheleri.
Zań jobasyn parlament mamyr aıynyń sońynda quptady. Ony zań shyǵarýshylardyń basym bóligi qoldady (550-diń 376-sy).
Parlament sheshimin Erdoǵan qoldady. Ol HDP-nyń «Kúrdistan jumys» partııasymen baılanysy bar dep sanaıdy. Erdoǵannyń paıymynsha, «Kúrdistan jumys» partııasy Túrkııa qalalaryndaǵy birqatar terrorlyq áreketterge jaýapty.
