R.Erdoǵan DAISh-tiń Túrkııaǵa munaı jetkizgeni dáleldense qyzmetten ketýge sóz berdi
ASTANA. QazAqparat - Túrkııa Prezıdenti Redjep Taıyp Erdoǵan Túrkııa «Islam memleketi» sodyrlarynan munaı satyp alyp jatqany dáleldense, otstavkaǵa ketýge daıyn ekenin aıtty, dep habarlady RBK túriktiń Daily Sabah basylymyna silteme jasap.
Bul týraly túrik lıderi reseılik prezıdent Vladımır Pýtınniń Sý-24 joıǵyshyna shabýyldy IM-niń Túrkııaǵa munaı tasymaldaýyn qorǵaýdyń áreketi dep ataǵan soń aıtty.
Erdoǵan mundaı aıyptaýlardy aıtý úshin dálelder kerektigin aıtty.
Sonymen qatar ol Túrkııa qaı elderden munaı satyp alatyny belgili ekendigin jetkizdi.
«Biz munaıdy Reseı, Iran, Ázerbaıjan, Katar jáne Nıgerııadan satyp alamyz. Sondyqtan bul aıyptaýlar jónsiz», - dep atap ótti Erdoǵan.
Parıjdegi Klımattyq konferentsııadan keıingi baspasóz-konferentsııasynda Reseı prezıdenti Sý-24 joıǵyshyna shabýyldaý sebebi «Islam memleketi» sodyrlarynyń Túrkııaǵa munaı tasymaldaýyn qorǵaýdyń áreketi bolýy múmkindigin aıtty.
«Qazir bizde DAISh baqylaıtyn jerden óndiriletin munaı Túrkııa aýmaǵyna jetkiziletini jaıly qosymsha aqparat aldyq, - dedi Pýtın. - Osyǵan baılanysty munaıdy tasymaldaýdy qorǵap qalý úshin bizdiń ushaqqa shabýyl jasady dep oılaýymyzdyń negizi bar». «Biz qaı elderden munaı satyp alatynymyz barlyǵyna belgili. AQSh qazynashylyǵy «Islam memleketinen» munaı satyp alatyndardyń biri - bul Reseı men Sırııa azamaty ekenin habarlaǵan. Aldymen osy úshin jaýap bersin», - degen Erdoǵannyń sózderin TASS keltirdi. Ótken aptada AQSh Qarjy mınıstrligi Sırııa boıynsha sanktsııalanǵan tizimge reseılik bıznesmen jáne FIDE basshysy Kırsan Ilıýmjınovty engizdi. Sol kezde sanktsııaǵa Reseı men Sırııa azamaty Djordj Hasvanı da ilikti. AQSh oǵan Bashar Asad úkimetiniń múddesine sáıkes «Islam memleketinen» munaı satyp aldy degen kúdikpen qaraýda.
Reseı prezıdentiniń baspasóz hatshysy Dmıtrıı Peskov «Vestı nedelıge» bergen suhbatynda túrik prezıdentiniń uly munaı bıznesine qyzyǵýshylyq tanytatyny jónindegi aqparat bar ekenin aıtty.
