R.Erdoǵan: B.Obamamen sóılesýdi doǵardym
ASTANA. QazAqparat - Túrkııa Premer-Mınıstri Redjep Erdoǵan AQSh Prezıdenti Barak Obamamen telefon arqyly jeke sóılesýden tyıylǵanyn málim etti, dep habarlady sheteldik BAQ.
«Ótken joly men Obamaǵa tikeleı qońyraý shaldym. Endigi ýaqytta bizdiń syrtqy ister mınıstrlerimiz ózara sóılesýde. Óıtkeni, men Sırııa boıynsha kútken nátıjelerge qol jetkize almadym», - dedi R.Erdoǵan.
«Men ádildikti kútken edim jáne ádildik jaqtastary sanalatyndardan mundaıdyń shyǵatynyn elestete de almaımyn», - dep qosty Túrkııanyń Úkimet basshysy.
Aıta keteıik, Vashıngton men Ankara arasyndaǵy dúrdarazdyq AQSh-tyń Sırııaǵa qatysty áskerı operatsııa júrgizbeýinen keıin týyndaǵan edi. Al áskerı operatsııanyń oryn alýyna R.Erdoǵan úmit artqan bolatyn. Budan bólek Túrkııa Premer-Mınıstri men Vashıngton arasynda Gaza sektoryndaǵy oqıǵalarǵa qatysty qarama-qaıshylyqtar bar. Eske alar bolsaq, 2 aptanyń ishinde Izraıl áskeri 580-nen astam palestındikti óltirgen-di. Osyǵan oraı R.Erdoǵan bul oqıǵalardy «memlekettik lańkestik», «genotsıd» dep baǵalap, AQSh-tyń Izraılge qoldaý kórsetýin synaǵan bolatyn.
