Іri bıznesmenderimiz qarapaıymdylyq, ustamdylyq sııaqty qasıetterge mán bere qoımaıdy – Memleket basshysy

ASTANA. KAZINFORM – Іri bıznesmenderimiz qarapaıymdylyq, ustamdylyq sııaqty qasıetterge mán bere qoımaıdy. Bul týraly «Turkistan» gazetine suhbat bergen Memleket basshysy Qasym-Jomart Toqaev aıtty.

– Bıznes – kez kelgen eldegi ekonomıkanyń negizgi tiregi. Biz uzaq joldy júrip óttik. Osy jolda jurt jeke menshik ınstıtýtyna eshkim qol suqpaýǵa tıis ekenin túsine bastady. Men memlekettik bılik júıesinde joǵary laýazymdy qyzmetterdi atqara júrip, sózben de, ispen de ulttyq býrjýazııanyń zańdy múddesin qorǵaýǵa tyrystym. Sebebi, ekonomıkany órkendetý jáne memlekettiń qoǵamdyq negizderin nyǵaıtý isinde kásipkerler eleýli ról atqaratynyn jaqsy túsinemin. Tarıhı sebepter men ult bolmysyndaǵy erekshelikterge baılanysty iri bıznesmenderimiz qarapaıymdylyq, ustamdylyq sııaqty qasıetterge mán bere qoımaıtyny ras, - dedi Prezıdent.

Osy oraıda Memleket basshysy Shveıtsarııada jumys istep júrgende asa iri ári belgili kásipkerlermen kezdesýler ótkizgenin eske aldy.

- Sol kezde olardyń óz qarajatyn óte únemdep jumsaıtynyn jáne elden daralanyp kózge túskisi kelmeıtinin kórip, tańǵaldym. Mıllıardtaǵan qarjysy bar adamdar qonaqúıdiń qarapaıym bir bólmesinde turýǵa namystanbaıdy. Jeke ushaqpen ushpaq túgili, birinshi sanattaǵy oryndarǵa da otyrmaıdy. Biraq, bul – olardyń boıynda ǵasyrlar boıy qalyptasqan daǵdy.

Al, bizdiń kásipkerlerimiz úshin qalypty kórinetin ómir salty keıde qoǵamnyń narazylyǵyn týdyryp jatady. Mundaı jaǵdaı kóptegen elde bar. Sol úshin de qaıyrymdylyq qyzmeti jumys isteıdi. Bul – qoǵam men bıznes arasyndaǵy ózara kelisim ispettes, - dedi Qasym-Jomart Toqaev.

Aıta keteıik, búgin Turkistan» gazetinde Memleket basshysy Qasym-Jomart Toqaevtyń atalǵan basylymnyń bas redaktory, belgili aqyn, pýblıtsıst Baýyrjan Babajanulyna bergen keń kólemdi suhbaty jarııalandy.