Іri bıznes elimizdiń tehnologııalyq jáne ınnovatsııalyq damýynda mańyzdy ról atqarady – Oljas Bektenov
ASTANA. KAZINFORM – Oljas Bektenov iri bıznes ókilderimen ekonomıkanyń naqty sektoryn damytý máselelerin talqylady. Bul týraly QR Úkimetiniń baspasóz qyzmeti málimdedi.
Premer-Mınıstr Oljas Bektenovtiń tóraǵalyǵymen «Atameken» kásipkerler palatasy men iri bıznes ókilderiniń qatysýymen Otandyq kásipkerler keńesiniń otyrysy ótti.
Basty maqsat – Prezıdenttiń «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty Qazaqstan halqyna Joldaýynda qoıǵan mindetterdi iske asyrý sheńberinde kásipkerlikti damytýdyń ózekti máselelerin talqylaý jáne odan ári ózara is-qımyl sharalaryn qarastyrý.
Oljas Bektenov memleket ınvestıtsııalyq tartymdylyqty arttyrý, elimizdiń ónerkásiptik áleýetin ashý, ınfraqurylymdyq máselelerdi sheshý jáne ekonomıkanyń naqty sektoryn damytý boıynsha aýqymdy jumystar atqaryp jatqanyn atap ótti. Óz kezeginde, iri bıznes elimizdiń tehnologııalyq jáne ınnovatsııalyq damýynda mańyzdy ról atqarady, shaǵyn jáne orta kásipkerlikti damytýǵa múmkindik beredi.
Talqylaý barysynda energetıka, óńdeý, ónerkásibi munaı-gaz sektory, taý-ken metallýrgııa kesheni, AÓK, kólik jáne qarjy salasy, densaýlyq saqtaý, ІT, týrızm salalarynyń ókilderi óz usynystaryn bildirdi. Metaldardy tereń óńdeý, munaı-gaz hımııasy jáne basqa da basym salalardaǵy jańa jobalarǵa basa nazar aýdara otyryp, otandyq taýar óndirýshilerdi qoldaý máseleleri kóterildi.
Elishilik qundylyqty damytýǵa erekshe kóńil bólindi. Úkimet «Atameken» UKP-men birlesip, taýarlardaǵy, jumystar men kórsetiletin qyzmetterdegi qazaqstandyq qamtý úlesin aıqyndaý boıynsha jańa ádisnamany ázirleý boıynsha jumys júrgizýde. Oljas Bektenov jańa tetik anaǵurlym ádil bolatynyn jáne otandyq kásiporyndardyń damýyna eleýli serpin beretinin atap ótti. Tıisti qurylymdarǵa júrgizilip jatqan jumysty jedeldetý tapsyryldy.
Jasandy ıntellekt júıelerin qoldanýdy keńeıtý jáne tsıfrlyq tehnologııalardy damytý máseleleri qaraldy. Ekologııalyq taza, energııa únemdeıtin jáne tómen kómirtekti jobalardy iske asyrýǵa baǵyttalǵan týrızm, turǵyn úı-kommýnaldyq sharýashylyq, «jasyl» qarjylandyrý salasyn damytýdyń mańyzdy ekeni aıtyldy.
Talqylaý barysynda elimizdi turaqty energııamen qamtamasyz etý máselesine nazar aýdaryldy. Bıznes ókilderi Memleket basshysynyń atom energetıkasyn damytý jónindegi bastamasyn qoldap, energııa tapshylyǵy jaǵdaıynda ónerkásipti odan ári damytý jáne jańa nysandardy iske qosý úshin turaqty ári senimdi energııanyń jańa kózi qajet ekenin atap kórsetti. Osylaısha, bıylǵy 6 qazandaǵy atom elektr stansasyn salý jónindegi referendýmda oń sheshim qabyldanǵan jaǵdaıda, elimizde aǵymdaǵy jáne keleshegi bar óndiristerdiń energetıkaǵa degen qajettilikterin jabýǵa, jańa jumys oryndaryn ashýǵa jáne t. b. múmkindik bolady.
Kezdesýdi qorytyndylaı kele, Premer-Mınıstr Prezıdent alǵa qoıǵan mindetterge qol jetkizý úshin bıznesti ekonomıkanyń naqty sektoryn damytýǵa belsendi tartý qajet ekenin atap ótti.
«Memleket basshysy Qazaqstandy jan-jaqty jańǵyrtýdy belsendi júrgizýde. Ekonomıkadaǵy ósim azamattarymyzdyń turmys sapasyn jaqsartýǵa tikeleı áser etýi mańyzdy. Sonymen birge iri bıznes áleýmettik jaýapkershilikti kórsetýi kerek. Prezıdent kelesi jyldy Jumysshy mamandyqtary jyly dep jarııalaǵanyn bilesizder. Bizde iri kásipkerler kolledjderge qamqorlyq jasap, mamandar daıarlaýǵa tıisti baza quratyn sátti úlgiler bar. Bul model sonymen qatar bızneske bolashaq kadrlardy daıyndaýǵa múmkindik beredi. Jumysshy mamandyqtary jyly aıasynda mundaı tájirıbeni jandandyrý qajet», — dep atap ótti Oljas Bektenov.
Aýylda kásipkerlikti damytý jáne aýyl turǵyndaryn jyl boıy jumyspen qamtý qajettigi atap ótildi.
Úkimet basshysy tıisti mınıstrlikterge bıznes ókilderi tarapynan aıtylǵan, «jasyl jobalardy» nesıeleýden túsetin kiriske tómendetilgen salyq mólsherlemesin engizý, otandyq tuqym sharýashylyǵyn damytý boıynsha dıqandardy yntalandyrý sharalaryn jetildirý, otandyq analogtar bolǵan jaǵdaıda ımporttyq taýarlar men qyzmetterdi satyp alýdy azaıtý múmkindigin qarastyrý syndy usynystardy zerdeleýdi tapsyrdy.
