Іri bıznes bolmasa, Qazaqstan ekonomıkasynyń áleýetin tolyq ashý múmkin emes – Prezıdent
ASTANA. KAZINFORM - Qasym-Jomart Toqaevtyń otandyq bıznes ókilderimen kezdesýi memleket pen ekonomıkany damytýǵa úles qosyp júrgen kásipkerlerdiń maqsat-nıeti bir ekenin kórsetti. Prezıdent aıqyndaǵan strategııalyq mindet – ekonomıkany nyǵaıtý arqyly Qazaqstannyń óńirdegi kóshbasshylyq rólin saqtaý jáne kúsheıtý, dep habarlaıdy Aqorda.
Memleket basshysynyń pikirinshe, bul mindet ulttyq ıdeıanyń mańyzdy elementine aınalýǵa tıis.
Qasym-Jomart Toqaev qazirgi zamannyń basty máselelerin sheshý jolynda Qazaqstan jańa kózqarastar men tásilder dáýirine qadam basqanyn, al eskirgen stereotıpter ótkenniń enshisinde qalǵanyn atap ótti. Sondyqtan elimiz túbegeıli ózgerip, jańa jaǵdaıǵa beıimdelýi kerek.
Prezıdent memlekettiń bolashaǵy, sonyń ishinde óskeleń urpaqtyń keleshegi osy máseleniń sheshimine tikeleı baılanysty dep sanaıdy. Onyń aıtýynsha, iri ınfraqurylymdyq jáne ónerkásiptik jobalar, tsıfrlandyrý men jasandy ıntellekt, kólik jáne logıstıka salalary ekonomıkany damytýdyń basym baǵyttaryna aınalýǵa tıis. Bul rette shaǵyn jáne orta bıznesti qoldaý máselesi udaıy Úkimet nazarynda bolady.
Qasym-Jomart Toqaev alǵa qoıylǵan mindetterdi sheshý jolynda memleket pen iri kásiporyn ıeleriniń arasyndaǵy nátıjeli seriktestiktiń mańyzdy ekenin atap ótti.
– Іri bıznes bolmasa, Qazaqstan ekonomıkasynyń áleýetin tolyq ashý múmkin emes. Bizge ekonomıkanyń damýyn jańa deńgeıge kóterý úshin ınfraqurylym, ındýstrııa, tsıfrlandyrý jáne basqa da salalarda serpindi ári aýqymdy jobalar qajet. Muny iske asyrýǵa iri bıznesmenderdiń shamasy jetedi. Sizderde oǵan qajetti qarjy da, mamandar da, eń bastysy, bilim men tájirıbe de bar.
Bul rette ınvestıtsııa salýǵa tartymdy dástúrli salalarǵa mán berip qana qoımaı, tabys ákeletin jańa baǵyttardy qarastyrǵan jón. Qazirgi geosaıası jaǵdaı men álemdik saýda konıýnktýrasyn eskersek, kólik-logıstıka salasynyń orasan zor áleýeti eleýsiz qalyp jatyr.
Temirjol, avtomobıl jáne áýe arqyly júk tasymalyna suranys artyp keledi. Іs júzinde, atalǵan sektor basymdyqqa ıe bola bastady. Keıbir sholýshylardyń aıtýynsha, paıdasy da mol.
Bolashaǵy zor taǵy bir sala – týrızm. Sheteldikter Qazaqstannyń tumsa tabıǵatyna, halqymyzdyń salt-dástúri men tarıhı murasyna erekshe qyzyǵýshylyqpen qaraıdy. Biraq otandyq týrızmniń áleýeti zor desek te, naqty iske kelgende bul salada olqylyqtar men kemshilikter kóp. Sondyqtan Úkimet týrızmdi damytýǵa meılinshe kóbirek ınvestıtsııa tartý úshin qosymsha sharalardy usynady, – dedi Prezıdent.
Jıyn barysynda Premer-Mınıstrdiń orynbasary – Ulttyq ekonomıka mınıstri Serik Jumanǵarın, «Resmi kompanııalar toby» JShS, «RG Brands» AQ prezıdenti Qaırat Májibaev, «Qazaqmys Holdıng» dırektorlar keńesiniń tóraǵasy Edýard Ogaı, InDrive kompanııasynyń bas atqarýshy dırektory Arsen Tomskıı, «AUDACIA Express» JShS bas dırektory Baqytbek Qadyrov, «Qazaqstan Halyq banki» AQ basqarma tóraǵasy Úmit Shaıahmetova, «BI-Group» holdıngi dırektorlar keńesiniń tóraǵasy Aıdyn Rahymbaev, «Karazhal Operating» kompanııasynyń teń ıegeri, «Paryz» QR Jumys berýshiler ulttyq konfederatsııasy tóralqasynyń tóraǵasy Jumabek Janyqulov, «Evrazııa ınvest» JShS dırektory Ivan Georgıadı, «Qaraǵandy farmatsevtıkalyq kesheni» JShS bas dırektory Sergeı Baron, «Atameken» UKP tóralqasynyń tóraǵasy Raıymbek Batalov sóz sóıledi.
Sonymen qatar Freedom Holding Corp basqarma tóraǵasy Tımýr Týrlov, TsARKA prezıdenti Oljas Sátıev, «ElteksAlataý» JShS dırektory Nurlan Jánibekov, «Aq Niet Group» JShS Baqylaýshylar keńesiniń múshesi Nurjan Nııazálıev, Qazaqstannyń qorǵanys-ónerkásip kesheni kásiporyndary qaýymdastyǵynyń tóraǵasy Aıbek Barysov pikir bildirdi.
Prezıdent qosylǵan qun salyǵy máselesine qatysty oı bildirip, onyń mólsherlemesi saralanyp belgilenýi tıistigin aıtty.