«Qyzyljar» fýtbol klýby jekeshelendirý kezeńinen ótti
PETROPAVL. KAZINFORM — Jekege ótken «Qyzyljar» FK úsh jylda bıýdjetten 5,5 mlrd teńgege qarjylandyrylady.
Soltústik Qazaqstan oblysy dene shynyqtyrý jáne sport basqarmasynyń málimetinshe, Memleket basshysynyń fýtbol klýbtaryn jekeshelendirý jónindegi tapsyrmasyn iske asyrý aıasynda «Qyzyljar» fýtbol klýbynyń jekemenshik ınvestory retinde Rare Metals Kazakhstan kompanııasynyń ókili, kásipker Sergeı Kan anyqtalǵan.
Investordyń bastamasymen jańa zańdy tulǵa — «Qyzyljar» fýtbol klýby» jeke mekemesi tirkeldi. Buǵan deıin jumys istep kelgen «Kyzyl-Jar SK» JShS men jańa jeke mekeme arasynda barlyq qajetti kelisimderge qol qoıylǵan.
— Qazir fýtbol klýbynyń oblys atynan respýblıkalyq jarystarǵa daıyndalyp, qatysýyn qamtamasyz etý maqsatynda 2026-2028 jyldarǵa arnalǵan memlekettik satyp alý rásimi júrgizilip jatyr. Ol fýtbol ortalyǵynyń negizgi jáne balalar-jasóspirimder komandalaryn qamtıdy. Osy aralyqta memlekettik qarjylandyrý kólemin kezeń-kezeńimen azaıtý josparlanǵan, — delingen basqarmanyń jaýabynda.
Máselen, 2026 jyly klýbqa 2 mlrd teńge bólý kózdelip otyr, onyń 1,4 mlrd teńgesi negizgi komandaǵa, 559 mln teńgesi balalar fýtbolyna baǵyttalady. 2027 jyly jalpy qarjy kólemi 1,8 mlrd teńge bolsa, al 2028 jyly 1,7 mlrd teńge bólinbek. Bul qarjynyń basym bóligi negizgi komanda men jasóspirimder fýtbolyn damytýǵa jumsalmaq.
— Sonymen qatar, ınvestor jyl saıyn keminde 1 mlrd teńge mólsherinde jeke qarajat bólip, klýbtyń qosymsha shyǵyndaryn, onyń ishinde legıonerlerge qatysty shyǵyndardy óteýdi josparlap otyr. Al bolashaqta «Qyzyljar» fýtbol klýby tolyǵymen ınvestor qarajaty esebinen qarjylandyrylatyn bolady, — deıdi basqarma ókilderi.
Buǵan deıin Qyzylorda bıligi jekemenshikke ótken fýtbol klýbyn qarjylandyrýdy nege toqtatpaı otyrǵany týraly jazǵan edik.