Qyzyljar AEA-ǵa 9,6 mlrd teńge bólindi: jańa óndirister men jumys oryndary ashylady
ASTANA. KAZINFORM — Bólingen qarajat esebinen jańa ınfraqurylym men ınjenerlik kommýnıkatsııalar salý ekonomıkanyń keleshegi zor salalarynda ınvestıtsııalyq jobany iske qosýdy jedeldetedi, dep habarlaıdy Úkimettiń baspasóz qyzmeti.
Úkimet Memleket basshysy Qasym-Jomart Toqaevtyń óńirlerdiń ekonomıkalyq áleýetin nyǵaıtý jáne iri ınfraqurylymdyq jobalar qurý jónindegi tapsyrmalaryn júzege asyrý sheńberinde Soltústik Qazaqstan oblysynda Qyzyljar arnaıy ekonomıkalyq aımaǵyn damytýǵa Arnaýly memlekettik qordan 9,6 mlrd teńge bóldi.
Qazirgi tańda Qyzyljar AEA-ǵa 20-dan astam qatysýshy tirkelgen, olardyń jalpy jarııalanǵan ınvestıtsııasynyń kólemi 317,1 mlrd teńgeni quraıdy. Bul 4 myńǵa jýyq turaqty jumys ornyn qurýǵa múmkindik beredi. Onyń ishinde quny 28,4 mlrd teńge bolatyn 5 joba qazirdiń ózinde iske qosyldy.
Bul kásiporyndarda 700-ge jýyq jańa jumys orny ashyldy. Bólingen qarajat esebinen jańa ınfraqurylym men ınjenerlik kommýnıkatsııalar salý ekonomıkanyń keleshegi zor salalarynda, mysaly, tamaq ónerkásibi, mashına jasaý, AÓK sııaqty jáne basqa da salalarda taǵy 16 ınvestıtsııalyq jobany iske qosýdy jedeldetedi.
Investıtsııalardyń jıyntyq kólemi 279 mlrd teńgeni quraıdy, 3 myńnan astam turaqty jumys ornyn ashý josparlanyp otyr.
Qazir AEA aýmaǵynda sýmen jabdyqtaý jáne jaýyn sýyn burýǵa arnalǵan káriz jumystary aıaqtaldy. №3 qosalqy aımaqqa arnalǵan temirjol jelileriniń qurylysy bastaldy. Bul rette jylý jelilerin tartý, joldar, drenaj júıesi, baılanys jelilerin tartý jáne aýmaqty abattandyrý jumystary júrgizilip jatyr. Jańa óndiris oryndaryn iske qosý Soltústik Qazaqstan oblysynyń odan ári áleýmettik-ekonomıkalyq damýyna yqpal etip, óńirdiń ónerkásiptik áleýeti men ınvestıtsııalyq tartymdylyǵyn arttyrady.