«Qyzyl Book Art: Dala qazynasy» respýblıkalyq sýret baıqaýyna ótinim qabyldaý bastaldy
ASTANA. KAZINFORM – 5 maýsym kúni atalyp ótetin Dúnıejúzilik qorshaǵan ortany qorǵaý kúni men Ekolog kúnine oraı uıymdastyrylǵan «Qyzyl Book Art: Dala qazynasy» respýblıkalyq sýret baıqaýyna ótinim qabyldaý bastaldy. Bul týraly Mádenıet jáne aqparat mınıstrligi habarlady.
Baıqaýdyń taqyryby – Qazaqstannyń Qyzyl kitabyna engen janýarlar men ósimdikter álemi. Shyǵarmashylyq saıys jas talanttardy qoldaýǵa jáne ekologııalyq mádenıetti qalyptastyrýǵa baǵyttalady. Jobany Kreatıvti ındýstrııalardy damytý qory korporatıvtik qory uıymdastyryp otyr.
Baıqaýǵa elimizdiń barlyq óńirinen 1-11 (12) synyp oqýshylary qatysa alady. Qatysýshylar 1-4 synyp, 5-8 synyp jáne 9-11 (12) synypqa bólinip, úsh jas sanaty boıynsha baq synaıdy.
Qatysýshylar Qazaqstannyń Qyzyl kitabyna engen janýar nemese ósimdik túrin tańdap, onyń beınesin óz týyndysynda usynýy tıis. Jumysta tańdalǵan ósimdik ne janýardyń tabıǵattaǵy orny, ereksheligi, meken etý ortasy jáne ony saqtaýdyń mańyzy kórsetilýi qajet.
Sýretpen qosa, ár qatysýshy kólemi 500 tańbaǵa deıingi «Nelikten men dál osy túrdi tańdadym jáne onyń bolashaq urpaq úshin mańyzy qandaı?» taqyrybynda shaǵyn esse jazýy kerek.
Zamanaýı óner, street art jáne eksperımenttik baǵyttaǵy jumystar qabyldanady.
Baıqaýǵa qatysý úshin oqýshy jumysy Instagram, TikTok, Facebook, Threads nemese X áleýmettik jelileriniń birinde jarııalanýy qajet. Sonymen birge qatysýshy týraly málimet kórsetilip, #DalaQazynasy jáne #QazaqCreative heshtegteri, sondaı-aq @qazaqcreative resmı paraqshasy belgilenýi tıis.
Keıin qatysýshy https://forms.gle/Atqq7GBK8btzmovD7 siltemesi arqyly ótinim toltyryp, sýrettiń faılyn, esseni jáne áleýmettik jelidegi jarııalanymǵa siltemeni qosa tirkeýi kerek.
Ótinim qabyldaý 2026 jylǵy 5 maýsym men 27 shilde aralyǵynda jalǵasady. Baıqaý jumystaryn kásibı sýretshiler, ıllıýstratorlar jáne sala mamandarynan quralǵan saraptama komıssııasy baǵalaıdy. Sonymen qatar «Halyq tańdaýy» atalymy boıynsha ashyq onlaın daýys berý uıymdastyrylady.
Budan bólek, «Úzdik ekologııalyq úndeý», «Úzdik kórkem sheshim», «Úzdik tsıfrlyq týyndy», «Eń jas talant» jáne «Halyq tańdaýy» arnaıy atalymdary taǵaıyndaldy.
Baıqaý qorytyndysy boıynsha úzdik jumystar Qazaqstannyń Qyzyl kitabyna engen janýarlar men ósimdikterge arnalǵan «Qyzyl Book Art: Dala qazynasy» arnaıy art-kitabynda jaryq kóredi. Sondaı-aq jeńimpazdarǵa aqshalaı syılyqtar tabystalady.
Astanada kóshe sýretshisi Benksıge arnalǵan mýltımedııalyq kórme ashylǵanyn jazǵan bolatynbyz.
