QyzPU stýdentteri pedagogterge arnalǵan AI-Lesson Study JI platformasyn ázirledi
ASTANA.KAZINFORM – AI-Sana baǵdarlamasy aıasynda Qazaq ulttyq qyzdar pedagogıkalyq ýnıversıtetiniń stýdentteri pedagogterdiń kásibı qyzmetin qoldaýǵa arnalǵan AI-Lesson Study jasandy ıntellekt platformasyn ázirledi.
QR Ǵylym jáne joǵary bilim mınıstrligi baspasóz qyzmetiniń habarlaýynsha, joba ýnıversıtettiń Digital Lady tehnoparki bazasynda júzege asyryldy. Ázirlemege ınjener-baǵdarlamashy Ramazan Baısultan men Lesson Study zertteýiniń jetekshisi Lázzat Rsalına ǵylymı-ádistemelik jetekshilik etti.
Joba avtorlarynyń aıtýynsha, platformanyń negizine Lesson Study pedagogıkalyq tásili alynǵan. XIX ǵasyrda Japonııada qalyptasqan bul ádis búginde AQSh, Sıngapýr, Ulybrıtanııa sııaqty elderdiń bilim berý júıesinde keńinen qoldanylady.
Qazaqstanda Lesson Study ádisi 2012 jyldan beri engizilip keledi. Al Qazaq ulttyq qyzdar pedagogıkalyq ýnıversıteti ony joǵary bilim berý júıesinde júıeli túrde qoldanǵan alǵashqy joǵary oqý oryndarynyń biri boldy. Ádistemeniń negizgi maqsaty – pedagogterdiń birlesip sabaq josparlaýy, oqý úderisin baqylaýy jáne taldaýy arqyly oqytý sapasyn arttyrý.
Ázirlengen AI-Lesson Study platformasy bolashaq pedagogterdiń, onyń ishinde Lesson Study ádisi boıynsha zertteý júrgizetin stýdentterdiń jumysyn jeńildetýge baǵyttalǵan. Júıe sabaq josparlaý, oqýshylardy baqylaý, zertteý nátıjelerin taldaý jáne refleksııa kezeńderin tsıfrlandyryp, jasandy ıntellekt negizinde ádistemelik usynymdar usynady.
Platforma quramynda paıdalanýshynyń jeke zertteý kabıneti, jasandy ıntellekt quraldary, ádistemelik materıaldar bazasy jáne zertteý máselelerin talqylaýǵa arnalǵan forým qarastyrylǵan.
-Jobany ázirleý barysynda stýdentter jasandy ıntellekt tehnologııalaryn naqty tsıfrlyq ónim jasaýǵa qoldaný boıynsha tájirıbe jınaqtady. Aldaǵy ýaqytta platformanyń fýnktsıonaldyq múmkindikterin tolyq iske qosyp, bilim berý uıymdarynda aprobatsııadan ótkizý jáne mektep pedagogteriniń kúndelikti tájirıbesine engizý josparlanyp otyr,-delingen habarlamada.
Jobanyń júzege asýyna qoldaý kórsetken Digital Lady tehnoparki – pedagogıka, ǵylym jáne tsıfrlyq tehnologııalardy biriktiretin ınnovatsııalyq alań. Tehnopark bazasynda Apple Class, 3D Lab jáne Atomdyq jáne ıadrolyq fızıka zerthanalary jumys isteıdi. Bul ınfraqurylym stýdentterdiń jasandy ıntellekt negizindegi tsıfrlyq sheshimderdi ázirlep, olardy bilim berý úderisine engizýine qolaıly jaǵdaı jasaıdy.
Osyǵan deıin qazaqstandyq ǵalymdardyń halyqaralyq ǵylymı bazalarǵa qoljetimdiligi artatyny týraly jazdyq.
