Qurt laqap atymen belgili reperdiń ústinen qylmystyq is qozǵaldy
ALMATY. KAZINFORM — Almaty polıtsııasy er adamnyń jaraqat alýyna baılanysty Qurt laqap atymen belgili Damır Qoıshybaevtyń ústinen is qozǵady.
Áleýmettik jelilerde taraǵan aqparatqa sáıkes, oqıǵa 30-nan 31 tamyzǵa túni bolǵan.
Jeli qoldanýshysynyń aıtýynsha, sheshendik óner kýrsy sabaǵynan keıin on shaqty stýdent oqytýshylarymen birge barǵa jınalǵan.
Reper de sol jerde óz tanystarymen birge bolǵan. Bir kezde qonaqtar arasynda daý týyndap, ol syrtta tóbeleske ulasqan. Post avtorynyń aıtýynsha, saldarynan jigit jaraqat alyp, aýrýhanaǵa jatqyzyldy.
Medeý aýdandyq polıtsııa bólimi qylmystyq is qozǵady. Oqıǵaǵa qatysqandardyń barlyǵy anyqtaldy.
— Olardy ustaý jumystary júrgizilip jatyr. Tergeý barysy polıtsııa bóliminiń basshylyǵynyń baqylaýynda, — dep habarlady Almaty polıtsııa departamentiniń baspasóz qyzmeti.
Eske salsaq, buǵan deıin akter Erkebulan Toqtarǵa balaǵat sóz aıtqany úshin aıyppul salynǵany jazyldy.
