QR tólemderi POS-termınal operatsııalarynan asyp tústi
ASTANA. KAZINFORM – 2026 jylǵy І jartyjyldyqtyń nátıjesi tólem naryǵynyń ornyqty damýymen jáne halyqtyń qolma-qol aqshasyz operatsııalarynyń ósýimen sıpattalady.
Ulttyq bank 2026 jylǵy І jartyjyldyqtyń qorytyndysy boıynsha tólem qyzmeti naryǵynyń damý barysyna sholý daıyndady. Qujatta Ulttyq banktiń tólem júıeleri, tólem kartalary men elektrondyq bank qyzmeti naryǵy, sondaı-aq halyqaralyq aqsha aýdarymdary júıeleri jumysynyń nátıjesi keltirilgen.
2026 jylǵy І jartyjyldyqtyń nátıjesi tólem naryǵynyń ornyqty damýymen jáne halyqtyń qolma-qol aqshasyz operatsııalarynyń ósýimen sıpattalady.
— Tólem kartalary men elektrondyq bank qyzmeti naryǵynda halyqtyń qolma-qol aqshasyz operatsııalary (sany 7,1 mlrd tranzaktsııaǵa deıin 5,1%-ǵa jáne kólemi 92,1 trln teńgege deıin 4,2%-ǵa) úzdiksiz ósip keledi. Esesine, qolma-qol aqsha alý operatsııalarynyń sany men kólemi (sany 5,8%-ǵa jáne kólemi 3,8%-ǵa) azaıǵan, — delingen Ulttyq bank habarlamasynda.
Kún saıyn halyq arasynda ortasha eseppen 509 mlrd teńgege 39 mln astam qolma-qol aqshasyz operatsııa júrgiziledi. Qolma-qol aqshasyz operatsııalar kóleminiń 90%-y ınternet, bankterdiń mobıldi qosymshalary men QR-kod arqyly jasalady.
— Sonymen qatar QR-men júrgizilgen operatsııalar sany men kólemi POS-termınal arqyly tólem kartasy paıdalanylǵan operatsııalardyń sany men kóleminen tıisinshe 38%-ǵa jáne 13%-ǵa kóp boldy, — delingen habarlamada.
Bul kórsetkishter tsıfrlyq tólem tásilderi tutynýshylardyń kúndelikti ádetine aınala bastaǵanyn aıǵaqtap, eldegi tsıfrlyq ekojúıege halyqtyń belsendi aralasyp júrgenin kórsetedi.
Ulttyq bank qarjy, korporatıvtik jáne memlekettik sektorlardyń tólemderine qyzmet kórsetetin Bankaralyq aqsha aýdarymdary júıesinen jáne Bankaralyq klırıng júıesinen basqa, halyqtyń jeke tranzaktsııalaryn óńdeýge arnalǵan Tólem kartalarynyń bankaralyq júıesi men Bankaralyq mobıldi tólemder júıesiniń (TKBJ men BMTJ) jumys isteýin qamtamasyz etedi.
TKBJ Qazaqstan aýmaǵynda tólem kartalarymen júrgizilgen bankaralyq tranzaktsııalardy óńdeýge arnalǵan. TKBJ 2026 jylǵy 6 aıda 3,3 trln teńgege 350 mln astam tranzaktsııany óńdedi.
BMTJ bankaralyq tranzaktsııalardyń telefon nómiri men QR-kod arqyly júrgizilýin qamtamasyz etedi. BMTJ iske qosylǵaly bir aıda (bıylǵy shildede) 210 mlrd teńgege 8 mln astam tranzaktsııa óńdeldi.
Halyqaralyq aqsha aýdarymdary júıesi shetelge aqsha aýdaryp, syrttan aqsha alý ádisinde halyq suranysyna ıe bolyp otyr. 2026 jylǵy І jartyjyldyqta halyqaralyq aqsha aýdarymy júıeleri arqyly jiberilgen aýdarymdardyń jalpy kólemi — 314 mlrd teńgege 881 myń tranzaktsııa. Al, shetelden alynǵan aýdarymdardyń ortasha somasy (2025 jylǵy 6 aıdaǵy derektermen salystyrǵanda) 9%-ǵa ulǵaıǵany baıqalady.
Aıta ketelik Qazaqstan Ulttyq banki otandyq reıtıng agenttiginiń quryltaıshysy bolady.
