QR-tólemderi QQS-tan bosatyla ma – Ulttyq bank jaýaby
ASTANA. KAZINFORM – QR-tólemderdi QQS-tan bosatý máselesi pysyqtalyp jatyr. Bul týraly Ulttyq bank Tólem júıeleri jáne tsıfrlyq qarjy tehnologııalary departamentiniń dırektory Erlan Ashyqbekov aıtty.
Úkimet otyrysynan keıingi baspasóz máslıhatynda BAQ ókilderi odan: «Buǵan deıin Úkimet QR-tólemderdi QQS-tan bosatýdy usynǵan bolatyn. Eger Úkimet bul sheshimdi qabyldasa bul bankter belgileıtin komıssııa mólsherine, atap aıtqanda, kásipkerler tóleıtin biryńǵaı QR komıssııasyna qalaı áser etedi?», dep suraǵan edi.
Saýalǵa jaýap bergen Erlan Ashyqbekov vıtse-premer Serik Jumanǵarınnyń tóraǵalyǵymen ótken Jobalyq keńse otyrysynda qolma-qol aqshasyz tólemderdi salyq salýdan bosatý máselesi qaralǵanyn aıtty.
- Bul, eń aldymen, jaǵdaıdy teńestirý úshin jasalyp otyr. Sebebi qoldanystaǵy Salyq kodeksine sáıkes, qolma-qol aqshasyz tólemderdiń birqatary, mysaly, kartalar arqyly jasalatyn tólemder QQS tóleýden bosatylǵan. Biz ulttyq tólem júıemizdi, sonyń ishinde biryńǵaı QR júıesin belsendi túrde damytyp jatqandyqtan osy jaǵdaılardy teńestirý qajet dep eseptedik. Bul túsinispeýshilikterdi boldyrmaýǵa, ákimshilendirýdi jeńildetýge jáne basqa da máselelerdi retteýge múmkindik beredi. Másele tujyrymdamalyq turǵydan qoldaýǵa ıe boldy. Qazir onyń jekelegen tustaryn Úkimetpen pysyqtap jatyrmyz. Odan keıin zań shyǵarýshylardyń qaraýyna engizemiz. Al túpkilikti sheshim, árıne, Quryltaıda qabyldanady, - dedi departament basshysy.
Aıta keteıik, Oljas Bektenov tsıfrlyq teńgeniń qoldaný aıasyn keńeıtýdi tapsyrdy.
