QR-kody bar týrıstik karta sheteldik qonaqtardyń qaýipsizdigin qamtamasyz etýge baǵyttalǵan
ASTANA. KAZINFORM — Memleket basshysy quqyq qorǵaý organdary alqasynyń keńeıtilgen otyrysynda týrızm salasyn damytý men sheteldik qonaqtar úshin qolaıly jaǵdaı jasaýdyń mańyzdylyǵyna toqtaldy. Osy tapsyrma aıasynda el aýmaǵyna kirgen árbir sheteldik týrıstke arnaıy QR-kody bar týrıstik karta usynylýda.
- Atalǵan karta týrısterdiń qaýipsizdigin qamtamasyz etýge jáne týrıstik ınfraqurylymdy damytýǵa baǵyttalǵan keshendi sharalardyń bir bóligi sanalady. Qazirgi tańda týrıstik kartalar Astana men Almaty qalalaryndaǵy halyqaralyq áýejaılarda, sondaı-aq Túrkistan oblysyndaǵy «Qaplanbek» shekaralyq baqylaý beketinde taratylyp jatyr, - dep málimdedi ІІM-nen.
Budan bólek, sheteldik qonaqtardyń jaıly demalysy úshin safetravel.kz mobıldi platformasy iske qosyldy. Týrıstik kartada kórsetilgen QR-kod arqyly birneshe tilde aqparat beretin arnaıy portalǵa ótýge bolady. Platformada tómendegideı mańyzdy málimetter ornalastyrylǵan:
-
jedel kómek qyzmetimen baılanys ornatýǵa arnalǵan «102» mobıldi qosymshasyn júkteý nusqaýlyǵy, onyń ishinde tótenshe jaǵdaı kezinde «SOS» batyrmasyn paıdalaný múmkindigi;
-
sheteldikterdi tirkeý jáne kóshi-qon talaptaryna qatysty jadynama;
-
jol aqysynyń ortasha baǵasy kórsetilgen taksı servısteri men mobıldi qosymshalar tizimi;
-
uıaly baılanys operatorlary men SIM-kartalardyń ortasha quny týraly aqparat.
Atalǵan bastama elimizge kelgen árbir sheteldik týrıstiń ózin qaýipsiz ári jaıly sezinýine jaǵdaı jasaýǵa baǵyttalǵan.
Aıta keteıik, mınıstrlik týrızm salasyna arnalǵan tsıfrlyq statıstıka júıesin engizbek.