QR arqyly táýligine 400 myń adam tekseriledi - Narıman Ábilshaıyqov

NUR-SULTAN. QazAqparat – QR arqyly táýligine 400 myń adam tekseriledi. Bul týraly búgin Úkimet otyrysynda «Atameken» ulttyq kásipkerler palatasy basqarma tóraǵasynyń birinshi orynbasary Narıman Ábilshaıyqov aıtty, dep habarlaıdy QazAqparat tilshisi.

«Búgingi tańda «Ashyq» qosymshasyn 4 mln-nan astam qoldanýshy paıdalanady. 12 sáýirden beri ózin-ózi oqshaýlaý rejımin buzǵan 46 myń adam anyqtaldy. Olardyń 29 myńnan astamy «qyzyl» jáne 16 myńy «sary» túste. Óz mártebesin onlaın rejımde tekserý úshin testilik QR jumys isteıdi. Ol arqyly táýligine 400 myńdaı adam tekseriledi. Negizinde onyń 1,5-2 paıyzy oń nátıjeli PTR test kórsetip otyr. Bul óz kezeginde epıdemııanyń taralýyna jol bermeıdi», - dedi Narıman Ábilshaıyqov.

Onyń atap ótýinshe, shilde aıynyń basynan bastap, saýda ortalyqtary jáne bazarlar eriktiler retinde jobaǵa kirip, keıinnen jobanyń tolyqqandy qatysýshysyna aınaldy. 200 myńǵa jýyq saýda sýbektileriniń qosylýy arqyly jobanyń aýqymy ulǵaıdy jáne «karantındi buzýshylardy» anyqtaý 10 esege ósti.

«Osy jyldyń 29 shildesinen bastap jobaǵa qosylatyndar úshin QR kodty alý tártibi jeńildetilip, protsester avtomattandyryldy. Nátıjesinde, merzimi 9 kúnnen 10 mınýtqa deıin qysqartyldy. Buryn 3 aı ishinde jobaǵa aptasyna 1000-ǵa jýyq sýbekt qosylsa, qazir olardyń sany 100 myńǵa deıin ósti. Osylaısha, 2 apta ishinde bul 5 esege artty. Jobaǵa qosylýda Nur-Sultan, Almaty, Shymkent qalalary, Qaraǵandy jáne Atyraý oblystary belsendilik tanytyp otyr. Birinshi kezekte bul óńirlerdiń «qońyr-qyzyl» aımaqqa kirýine baılanysty, «Ashyq» jobasyna qatysý olardyń jumys jasaýyna múmkindik beredi», - dedi ol.