QR arqyly basqa memleketterde tólem jasaýǵa múmkindik beretin júıe pysyqtalyp jatyr - UB

- Ózderińiz bilesizder, bıyl biz mobıldi tólemderdiń bankaralyq júıesin iske qosqan bolatynbyz. Qazir elimiz aýmaǵynda bankterdiń barlyǵy osy júıege kirdi. Sonymen qatar bankaralyq aýdarymdar mobıldi telefon nómirlerin qoldana otyryp nemese QR arqyly jasalyp jatyr. Endi qazir kelesi basty maqsat — osy júıeniń tıimdiligin odan ári arttyrý, onda jańa qosymsha servısterdi iske qosý. Bul baǵytta biz qazir banktermen óte tyǵyz jumys istep jatyrmyz. Keshe ǵana banktermen osy máseleni talqylap keldik. Onda tek qana QR ǵana, mobıl tólemder ǵana emes, sonymen qatar jańaǵy basqa jańa qyzmet túrlerin keńeıtý qarastyryldy. Bul rette, elektrondy kommertsııa salasy, zańdy tulǵalar arasyndaǵy tólemderdi jyldamdatý — osy máselelerdiń barlyǵy sol júıeniń negizinde júzege asatyn bolady, - dedi E. Ashyqbekov Úkimet otyrysynan keıingi baspasóz máslıhatynda. 

Budan bólek ol transshekaralyq, memleketaralyq tólemderdiń tıimdiligin arttyrý, QR arqyly el azamattarynyń basqa memleketterde tólem jasaýyna múmkindik jasaý, sondaı-aq shetel azamattarynyń Qazaqstan aýmaǵynda osy mehanızm arqyly tólem jasaýyna múmkindik berý tetikteri pysyqtalyp jatqanyn aıtty. 

- Osy baǵytta tıisti qadamdar iske asyp jatyr. Qazir bul másele boıynsha tehnıkalyq, jalpy bıznes-modelderi boıynsha jumys istelip jatyr. Bul endi bir kúnde isteletin sharýa emes. Sheteldik áriptesterimizben birlese otyryp, bul júıeni iske qosýdyń tujyrymdamalary ázirlenýde, jobalary jasalýda. Óıtkeni ár júıege qatysty tıisti tehnıkalyq talaptary men ózindik jumys isteý erekshelikteri bar. Sondyqtan bizdiń bankaralyq júıeni basqa memleketterdegi, basqa ıýrısdıktsııadaǵy bankaralyq júıemen ıntegratsııalaý máselesin eskerý kerek, - dedi UB ókili. 

Aıta keteıik, 2026 jyldyń sońyna deıin Qytaı men Qazaqstan arasynda tólem jasaıtyn QR-kod iske qosylatyny habarlandy.