Qostanai Tech: Qostanaıda aýqymdy otbasylyq ǵylymı-ınnovatsııalyq festıval ótedi
ASTANA. KAZINFORM — 29 sáýirde Qostanaı qalasynda QOSTANAI TECH otbasylyq ǵylymı-ınnovatsııalyq festıvali ótedi. Іri is-shara Jastar saraıy men Indýstrıaldy aımaq alańdarynda saǵat 09:00–den 20:00–ge deıin uıymdastyrylady.
Týrızm jáne sport mınıstrligi baspasóz qyzmeti málimetinshe, festıval ǵylym, tehnologııa jáne jasandy ıntellekt salasyndaǵy jetistikterdi tanystyrýǵa arnalǵan zamanaýı alań, sondaı-aq bilim berý, ǵylym jáne ónerkásip ókilderiniń ózara baılanys ornatý keńistigine aınalmaq. Qatysýshylar bolashaqty qalyptastyratyn ozyq ázirlemeler men ınnovatsııalyq sheshimdermen tanysa alady.
Festıval spıkerleri qatarynda Beıbitshilik salasyndaǵy Nobel syılyǵynyń laýreaty, ońtústikkoreıalyq dıplomat ári ǵalym Rae Kvon Chýng, fızıka-matematıka ǵylymdarynyń doktory, professor Asqar Jumadildaev, KIA QAZAQSTAN kompanııasynyń bas dırektory Kım De Kı, Freedom Cloud kompanııasynyń CEO-sy jáne Qazaqstan Respýblıkasy Prezıdenti janyndaǵy Jasandy ıntellektti damytý jónindegi keńestiń jumys tobynyń keńesshisi Temirlan Zınalabdın, sondaı-aq tehnologııa jáne bilim berý salasyndaǵy kásipker Ǵabıt Bekahmetov jáne basqa da sarapshylar bar.
Festıvaldiń hedlaınerleri — Alga.peterburg blogy arqyly tanymal Ivan Chervınskıı jáne qazaqstandyq ánshi Bayansulu.
Іs-shara baǵdarlamasyna ınteraktıvti kórmeler, robototehnıka aımaqtary, VR jáne AI keńistikteri, ǵylymı shoýlar men barlyq jas sanatyna arnalǵan sheberlik sabaqtary kiredi.
Atalǵan is-shara QR Týrızm jáne sport mınıstrligi bekitken 2026 jylǵa arnalǵan týrıstik is-sharalar kúntizbesine engizilgen jáne oqıǵalyq týrızmdi damytýǵa, sondaı-aq eldiń mádenı ımıdjin nyǵaıtýǵa baǵyttalǵan.
Osyǵan deıin Qostanaı men Tashkent arasynda tikeleı áýe reısi ashylatyny anyqtaldy.
