Qoldau.kz arqyly rásimdelgen sýbsıdııalar boıynsha 26 mlrd teńge qaryz bar – AShM

ASTANA. QazAqparat – Qoldau.kz platformasy arqyly rásimdelgen sýbsıdııalar boıynsha 26 mlrd teńge qaryz anyqtaldy. Búginde onyń jartysy jabyldy. Bul týraly Aýyl sharýashylyǵy mınıstriniń orynbasary Baǵlan Bekbaýov málim etti, dep habarlaıdy QazAqparat tilshisi.

«Búginde gosagro.kz aqparattyq júıesine 14 myńnan astam ótinim kelip tústi. Berilgen ótinimderdiń somasyn eseptesek 160 mlrd teńgeni quraıdy. Qazir 6 mlrd teńgeden astam somaǵa ótinim maquldandy, endi tólemdi kútip otyr. Sebebi aldyńǵy jyldan qaryzdar bar. Biz Qoldau.kz platformasynan bárin shyǵaryp, ózimizdiń aqparattyq júıege (Gosagro.kz) aýystyrdyq. 26 mlrd teńgege qaryz jınalyp qalǵan. Sharýalar ótinim bergennen keıin biz nege qarjy ala almaımyz dep jatady. Biz jergilikti aýyl sharýashylyǵy basqarmasymen baılanystamyz, olardyń aıtýynsha qaryzdary bar», - dedi Baǵlan Bekbaýov Májilistiń agrarlyq máseleler komıtetiniń otyrysynda.

Vıtse-mınıstrdiń aıtýynsha, ótinim berýshi aldymen burynǵy bereshegin jabýy kerek.

«Búginde 26 mlrd teńge qaryzdyń jartysy jabyldy. Máseleni sheshý úshin biz 24/7 rejıminde jumys istep jatyrmyz. Kóterilgen máselelerdi operatıvti túrde sheshýge daıynbyz», - deıdi ol.

Eske salsaq, osydan birer kún buryn mınıstrlik Qoldau.kz arqyly rásimdelgen sýbsýdııalarǵa qatysty málimetterdiń tekseriletinin habarlaǵan edi.

Buǵan deıin elimizde aýyl sharýashylyǵy salasyn sýbsıdııalaý máselelerine qatysty áleýmettik jelide jumys chattary qurylyp, odan bólek «bir tereze» qyzmeti iske qosylǵany týraly habarlaǵan edik.